Túrkistan oblysynda zańsyz kir jýatyn untaqtar jasaıtyn tseh anyqtaldy

NUR-SULTAN. QazAqparat – QR Qarjylyq monıtorıng agenttiginiń Túrkistan oblysy boıynsha aýmaqtyq departamentiniń qyzmetkerleri kontrafaktilik kir jýý untaqtaryn daıyndaıtyn astyrtyn tseh qyzmetiniń jolyn kesti.

Bul týraly QazAqparat agenttiktiń baspasóz qyzmetine silteme jasap habarlaıdy.

Jedel-izdestirý sharalary barysynda Túrkistan qalasynyń turǵyny R. Abdýllaev «Ishtıhat» turǵyn alaby, Dospanbet jyraý kóshesi mekenjaıy boıynsha tseh uıymdastyrǵany, onda zańsyz jolmen «Ariel», «Tide», «Mıf», «Persil» markaly 2, 3, 6 kg kólemdegi untaqtar daıyndaǵany anyqtaldy.

Untaqtardy býyp-túıýge jáne ólshep-oraýǵa arnalǵan 7 jabdyq, 500-den astam untaq qaptamasy, 20 kg-dyq 100-den astam untaq, belgili markalardyń ataýlary bar polıetılen paketter tárkilenip alyndy.

Quqyq ıesi «The Procter&Gamble Company» kompanııasyna zor zalal keltirildi.

R. Abdýllaevqa 5,9 mıllıon teńge kóleminde aıyppul salyndy.

«Kontrafaktilik taýarlardy óndirý jáne satý - bul kóp mıllıardtyq aınalymdy qamtıtyn jahandyq másele. Bul memleketke de, azamattardyń densaýlyǵy men qaýipsizdigine de aıtarlyqtaı zııan keltiredi.

Qaýip sonymen qatar kıim men balalar oıynshyqtarynan bastap tamaq pen dári- dármekterge deıin kontrafaktilik ónimderdiń keń tańdaýynda jatyr.

Qarjylyq monıtorıng agenttigi kontrafaktini óndirý jáne ótkizý derekterimen kúres júrgizýde»,-delingen QR Qarjylyq monıtorıng agenttiginiń baspasóz qyzmeti taratqan aqparatta.