Túrkistan oblysynda zańsyz aýlanǵan 400 keli balyq 3 balabaqshaǵa úlestirilip berildi
TÚRKІSTAN. QazAqparat – Túrkistan oblysynda «Brakoner» jedel-profılaktıkalyq is-sharasy ótkizilip, zańsyz balyq aýlaýshylardyń joly kesildi. Atalǵan shara barysynda Sozaq APB-niń polıtseıleri men orman sharýashylyǵy, «Ohotzooprom» qyzmetkerleri birlesken reıd jumystaryn júrgizdi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, tártip saqshylary Qarataý-Taıqońyr tehnologııalyq tas joly boıynda kúdik týǵyzǵan kólikti toqtatqan. Tekserý kezinde ishinen 400 keli zańsyz aýlanǵan túrli balyqtar men balyq aýlaýǵa arnalǵan qurylǵylar tabylǵan. Tergeý barysynda kúdiktilerdiń úsheýi de jergilikti turǵyndar bolyp shyqty. Olar óz kinálaryn tolyq moıyndady.
«Qazirgi ýaqytta atalǵan jaıt boıynsha QR QK-niń 335-baby «Balyq resýrstaryn, basqa da sý janýarlaryn nemese ósimdikterdi zańsyz aýlaý» babymen is qozǵalyp, sotqa deıingi tergeý amaldary júrgizilýde. Al, zańsyz aýlanǵan balyqtar Sholaqqorǵan aýylyndaǵy 3 bóbekjaı-balabaqshaǵa úlestirilip berildi», delingen habarlamada.
Polıtseıler «Brakoner» jedel-profılaktıkalyq is-sharasy Túrkistan oblysynyń aýmaǵynda 5 aqpanǵa deıin jalǵasatynyn eskertedi.
