Túrkistan oblysynda zamanaýı sport kesheni paıdalanýǵa berildi
TÚRKІSTAN. QazAqparat - Ordabasy aýdanyndaǵy Tórtkól aýyldyq okrýginde «Aýyl – el besigi» jobasy aıasynda zamanaýı sport kesheni paıdalanýǵa berildi, dep habarlaıdy QazAqparat tilshisi.
2,3 gektar aýmaqqa ornalasqan sport kesheniniń syrtynda fýtbol, shaǵyn fýtbol, basketbol jáne voleıbol men vorkaýtqa arnalǵan alańdar bar. Sondaı-aq, erkin kúres, grek-rım kúresi, sambo, dzıýdo, boks boıynsha kúndelikti jattyǵýlar ótkiziletin zalmen qatar qol doby, ústel tennısi, basketbol, voleıbol syndy komandalyq oıyndarmen aınalysýǵa jaǵdaı jasalǵan.
Aýyl turǵyndary men jastardy buqaralyq sportqa baýlıtyn dene shynyqtyrý jáne saýyqtyrý keshenin aralap kórgen oblys ákimi Ómirzaq Shókeev aýyl turǵyndary úshin sportpen aınalysýǵa jaǵdaı jasaý jalǵasatynyn aıtty.
Sonymen birge oblys ákimi osy keshende jattyǵyp júrgen jergilikti jas sportshy, bokstan Qazaqstan chempıonatynyń kúmis júldegeri Aralbek Qosymbaıdyń boks qolǵabyna qoltańbasyn qoıyp, sporttaǵy qadamyna sáttilik tiledi.
