Túrkistan oblysynda yntymaqty ulyqtaıtyn «Shańyraq» baıqaýy bastaldy

TÚRKІSTAN. QazAqparat - Elimizdiń Táýelsizdiginiń 30 jyldyǵyna oraı, Túrkistan oblysynda Qazaqstan halqy dostyǵyn dáripteýge arnalǵan «Shańyraq» baıqaýy bastalady. Bul týraly Óńirlik kommýnıkatsııalar qyzmetinde ótken brıfıngide oblystyq Qoǵamdyq damý basqarmasy basshysynyń orynbasary Dáýren Sarıev málimdedi, dep habarlaıdy QazAqparat tilshisi.

Dáýren Sarıevtiń aıtýynsha, bul baıqaý áleýmettik jeli qoldanýshylary arasyndaǵy úzdik jazba boıynsha uıymdastyrylmaq. Oǵan 1 naýryzdan 10 maýsymǵa deıingi jarııalanǵan materıaldar qabyldanady.

«Jazbalarǵa qoıylatyn talap - etnosaralyq qarym-qatynastyqty nyǵaıtý, eńbek adamy men úlgili otbasyn nasıhattaý. Sondaı-aq, qazaq tilinde óleń oqyp, án aıtyp, izgi tilek joldaý, jol sapardan pozıtıvti maqala jazý, tikeleı reportajdar jasaý. Baıqaýǵa kez-kelgen áleýmettik jeli qoldanýshysy, jýrnalıst, bloger, baspasóz ortalyqtarynyń mamandary qatysa alady. Baıqaýǵa qatysý úshin erejege saı keletin materıaldy áleýmettik jelidegi Facebook, Instagram paraqshalarynyń birinde jarııalaý qajet», - dedi klýb tóraǵasy.

Sondaı-aq, brıfıngige qatysqan Túrkistan oblysy «Qoǵamdyq kelisim» mekemesiniń basshysy Elmıra Janǵazıeva baıqaý sharttaryna tolyǵyraq toqtaldy. Onyń sózinshe, baıqaýǵa usynylǵan jumystar áleýmettik jelide nemese blogtuǵyrnamalarda kóp daýys jınaýy tıis. Qanshalyqty oqyrmannyń kóńilin aýdara bilgendigine mán beriledi. Sondaı-aq, materıaldyń áseri men durys baǵyty eskeriledi. Baıqaýdyń jalpy júldesi 1-oryn úshin syıaqy kólemi – 150 000 teńge; 2-oryn – 100 000 teńge; 3-oryn – 80 000 teńge belgilenip otyr. Sonymen qatar, jeńimpazdardan basqa, baıqaýǵa qatysqan ózge de úmitkerlerge yntalandyrý syılyǵy taǵaıyndalmaq.