Túrkistan oblysynda volonterler sleti ótti

TÚRKІSTAN. QazAqparat – Túrkistan oblysynda volonterlerdiń sleti uıymdastyrylyp, onda eriktiler qozǵalysyn damytý máseleleri sóz boldy. Atalǵan sharaǵa óńirdiń belsendi jastary qatysyp, volonterllerdi yntalandyrý jaıyn talqylady, dep habarlaıdy QazAqparat tilshisi.

Basqosýda sondaı-aq, «Volonter jylynyń» 7 jalpyulttyq jobasy aıasynda iske asyrylyp jatqan is-sharalar men jobalar aıtyldy. Arnaıy semınar-trenıng formatynda ótken jıynǵa QR psıhologııalyq assotsıatsııasynyń múshesi, psıholog-trener Nazıra Kenjebekkyzy tálimgerlik etti.

Oblystyq qoǵamdyq damý basqarmasy «Jastar resýrstyq ortalyǵy» mekemesiniń basshysy Amalbek Ómirtaıdyń aıtýynsha, bıylǵy «Volonter jylynda» olarǵa memleket tarapynan túrli qoldaý qarastyrylyp otyr.

«Mundaı semınar-trenıngter eriktilerdiń biliktiligin arttyrady. Sonymen qatar, oblysymyzdyń volonterleri osy ýaqytqa deıin de atalǵan qyzmettiń 7 baǵytyn damytýǵa belsendi qatysyp júr. Aldaǵy ýaqytta da olardyń belsendiligi men qulshynysy tómendemeıdi dep senemin» -, deıdi ortalyq basshysy.

Jastar basqosýynda volonter uǵymyna jalpy túsinik berilip, olardyń qoǵamdaǵy orny men mańyzy talqylandy. Psıhologııalyq oıyndar oınatylyp, jastar ózara tájirıbe almasty. Teorııalyq jáne praktıkalyq sabaqtardy qamtyǵan semınar óńirdiń birneshe aımaǵynda jalǵasyn tapty.

«Mundaı oıyndar volonterlerdiń túrli jaǵdaıda durys sheshim qabyldaýyna, óz oılaryn ashyq aıtý men maqsattaryn aıqyndaýǵa kómegin tıgizedi. Tórt kúnge sozylǵan semınar kezinde 16 aýdan-qalanyń jastarymen kezdestim. Olardyń belsendiligi meni tánti etti», - deıdi Nazıra Kenjebekkyzy.

Semınar-trenıng sońynda qatysýshylarǵa sertıfıkattar men arnaıy syılyqtar tabystaldy.