Túrkistan oblysynda veternıarlyq ahýal turaqty
TÚRKІSTAN OBLYSY. QazAqparat - Túrkistan oblysynda veterınarııalyq is-sharalardyń 9 aılyq josparyna sáıkes, janýarlardyń asa qaýipti 14 aýrýyna qarsy 28 mln 555 myń doza vaktsına egildi.
Búgingi tańda óńirde janýarlar arasynda veterınarlyq ahýal qatań baqylaýda. Bul týraly Túrkistan oblysy Óńirlik kommýnıkatsııalar qyzmetinde Aýyl sharýashylyǵy basqarmasynyń basshysy Nurbek Badyraqov málimdedi.
Enzootııalyq aýrýlardyń aldyn alý boıynsha kóktem, kúz aılarynda 2 mln 518,6 myń bas iri mal búrkilse, 8 mln 147,6 myń bas usaq mal toǵytylǵan. Sondaı-aq, úı irgelik qora jaılar men japsarlas aýmaqtary, býferlik aýmaqtar zalalsyzdandyrylyp otyr.
«Aýsyl aýrýyna qarsy vaktsına 1 mln 384,4 myń bas iri qara malǵa, 6 mln 86,4 myń bas usaq malǵa egilip, 2002 jyldan beri aýsyl aýrýy tirkelmegen. Al sibir jarasy aýrýyna qarsy 1 mln 201,6 myń bas iri qara malǵa, 5 mln 456,6 myń bas usaq malǵa, 302,9 myń bas jylqylarǵa, 25,2 myń bas túıelerge vaktsına egildi. Oblys aýmaǵynda 2003 jyldan beri janýarlar arasynda sibir jarasy aýrýy tirkelmedi», - dedi Nurbek Baqtybaıuly.
Sonymen qatar, saryp aýrýyna qarsy janýarlar arasynda dıognostıkalyq zertteýler jalpy 3 mln 377,7 myń bas malǵa júrgizildi. Nátıjesinde 389 bas iri qara mal, 532 bas usaq mal aýrýǵa «oń» nátıje kórsetip, arnaıy oryndarda soıylyp zalalsyzdandyryldy. Mal ıelerine jalpy 100 mln 570,2 myń teńge ótemaqy tólendi. Saryp aýrýymen adamdar arasynda aýrýshańdyq 37 adamǵa kemise, adamdardy kene shaǵý 333 adamǵa azaıǵan.
Oblysta mal kómindilerin tastaıtyn 257 oryn bar. Onyń ishinde: 111-i tıptik úlgide, 146-y yńǵaılastyrylǵan. Sonyman qatar, 14 dana ınsınerator peshi bar. Budan ózge, qutyrý aýrýyna qarsy 187,5 myń bas ıtke, 32,8 myń bas mysyqqa vaktsına egilgen. Qutyrý aýrýynyń aldyn alý maqsatynda búgingi tańǵa 55 362 bas qańǵybas ıt-mysyq aýlanyp joıylǵan.
