Túrkistan oblysynda vaktsına almaǵan balalar jappaı qyzylsha juqtyrdy
TÚRKІSTAN. QazAqparat - Túrkistan oblysynda 14 jasqa deıingi 48 bala qyzylsha juqtyrdy, dep habarlaıdy QazAqparat tilshisi.
Jyl basynan beri óńirde qyzylsha bolýy múmkin 119 jaǵdaı tirkelgen.
Onyń 70-i zerthanalyq tekserýden soń dáleldenip otyr. Vırýs juqtyrýshylar arasynda 14 jasqa deıingi 48 bala bar.
Sondaı-aq, epıdemıologtar júrgizgen taldaý nátıjesinde qyzylshaǵa qarsy vaktsınadan bas tartqandardyń kóbi ınfektsııa juqtyrǵany belgili bolǵan.
Olardyń arasynda Ordabasy, Saýran, Qazyǵurt, Shardara aýdandarynyń turǵyndary kóp.
«Qyzylsha - kóbine balalar arasynda jıi kezdesetin, aýa-tamshy joldary arqyly taraıtyn ınfektsııa. Kúz-kóktem mezgilderi - epıdemııalyq maýsymy sanalady. Adamnan adamǵa juǵýy óte joǵary. Aýrýdyń jasyryn kezeńi - 7-21 kún. Aýrý belgileri naýqaspen baılanysta bolǵannan keıin sýyq tııýdiń belgilerine uqsas sımptomdarmen biline bastaıdy» delingen Túrkistan oblystyq sanıtarııalyq-epıdemıologııalyq baqylaý departamentiniń baspasóz qyzmeti taratqan aqparatta.
