Túrkistan oblysynda úzdik medbıkeler marapattaldy
TÚRKІSTAN. QazAqparat - Túrkistan oblysynda «Halyqaralyq meıirgerler kúnine» oraı Túrkistanda saltanatty is-shara ótti. Oblys ákimdigi men Densaýlyq saqtaý basqarmasynyń uıymdastyrýymen ótken jıynda óńirdiń aq halattylary marapattaldy, dep habarlaıdy QazAqparat tilshisi.
Atalǵan sharaǵa qatysqan oblys ákimniń orynbasary Joldymurat Amanbaev pen Densaýlyq saqtaý basqarmasynyń basshysy Muqan Egizbaev óńirdiń 100 - den astam meıirbıkesine quttyqtaý sóz sóıledi. Úzdikterge oblys ákiminiń atynan, oblystyq máslıhattyń jáne Densaýlyq saqtaý basqarmasynyń atynan marapattaý qaǵazdaryn tabystady.
«Búgingi tańda óńirimizdegi 42 medıtsınalyq uıymda medbıkelermen qamtamasyz etý jaǵy 100% paıyzdy quraıdy. Bul elimiz boıynsha eń úlken kórsetkish sanalady. Óńirdegi medıtsına mekemelerdiń materıaldyq-tehnıkalyq jabdyqtalýy anaǵurlym jaqsardy. Zamanaýı qural-jabdyqtar men qondyrǵylar tek oblys ortalyǵynda ǵana emes, aýdandar men qalalarda da ornatylýda. Oblystaǵy medıtsınalyq uıymda 17 myńǵa jýyq orta býyn qyzmetkerleri halyqqa qyzmet kórsetedi. Halyqtyń densaýlyǵyn saqtaý syndy asyl mindet memlekettik saıasattyń negizi bolyp otyr»,- dedi Densaýlyq saqtaý basqarmasynyń basshysy Muqan Egizbaev.
Іs-sharaǵa aımaqtyń barlyq qala-aýdandarynan densaýlyq salasyna eńbegi sińgen 20 shaqty ardager arnaıy shaqyryldy. Kásibı merekege oraı oblystyń «Eń úzdik» degen medbıkeleri men akýsher jáne feldsherlerine zamanaýı teledıdarlar tabystaldy. Sondaı-aq, «Aqsý-Jabaǵyly» jáne «Birkólik» ońaltý-saýyqtyrý keshenderine 20 joldama berildi.
