Túrkistan oblysynda úzdik áleýmettik jobalar irikteldi

TÚRKІSTAN. QazAqparat – Túrkistan oblysynda «Qazaqstannyń úzdik áleýmettik jobalary» respýblıkalyq konkýrsynyń oblystyq irikteý kezeńi ótti. «Nur Otan» partııasy oblystyq fılıaly tóraǵasynyń birinshi orynbasary Beısenbaı Tájibaev komıssııa otyrysyn ashyp, konkýrstyń maqsaty men mindetin keń kólemdi túsindirip ótti, dep habarlaıdy QazAqparat tilshisi.

Basqosýda atalǵan sala boıynsha basqarma basshylary men úkimettik emes uıym ókilderinen qurylǵan komıssııa músheleri jobaǵa qatysýshylardy jeke –jeke tyńdap, jumystarymen tanysty.

Aıta keteıik, «Nur Otan» partııasynyń 2030 jylǵa deıingi «Baqýatty qoǵam: onjyldyqtyń 10 maqsaty» baǵdarlamasynyń» maqsattaryn iske asyryp, partııanyń «Baqytty otbasy», «Ardagerlerdi ardaqtaıyq» jáne «Kedergisiz keleshek» jobalary arqyly ózekti áleýmettik máselelerdi sheshýdi maqsat etken jobaǵa 8 úmitkerdiń jumysy usynyldy.

Atap aıtar bolsaq, Erkin Shaltan «Bıikke samǵa», Shoqan Baısengirov «Bárimiz birdeımiz, kemsitýdi bilmeımiz», Hamze Orazáli «Senim», Babırjan Asaev «Ómirge qushtarlyq», Vladıslav Golıarko «EkoEvolıýtsııa», Birjan Sarjanov «Biz birgemiz», Aıdos Imanbekov «Jastarǵa jarqyn bolashaq», Talǵat Ismaılov «Baqytty balalyq shaq» jobalaryn tanystyrdy.

Jıyn qorytyndysyna sáıkes úzdik jobalar anyqtalyp, «Qazaqstannyń úzdik áleýmettik jobalary» respýblıkalyq konkýrsyna usynyldy.