Túrkistan oblysynda uıymdasqan qylmystyq top qolǵa tústi
TÚRKІSTAN. QazAqparat – Túrkistan oblysynyń Krımınaldyq polıtsııa qyzmetkerleri 10 adamnan turatyn qylmystyq topty qolǵa túsirdi. Brakonerlikke qatysy bar degen kúdikpen ustalǵandardyń keltirilgen materıaldyq shyǵynnyń jalpy kólemi 8 mln astam teńgeni quraǵan, dep habarlaıdy QazAqparat tilshisi.
Oblystyq PD bastyǵynyń orynbasary Qurmanbek Sahovtyń aıtýynsha, qylmystyq top birneshe jyldar boıy Shardara sý qoımasynan zańsyz balyq aýlap júrgen. Jedel ýákilder kúdiktilerdi ustaý úshin eki aı boıy dáleldemeler jınaqtap, nátıjesinde olardy qolǵa túsirgen. 10 adamnan turatyn qylmystyq toptyń ishinde 3 áıel bolǵan. Olardyń barlyǵy Túrkistan oblysy men Shymkent qalasynyń 20-dan 53 jasqa deıingi turǵyndary ekeni anyqtaldy. Aıǵaqty zat retinde balyq aýlaıtyn elektr qural-jabdyqtary men jeliler, metall ilmekter men 13 motorly jáne rezeńke qaıyqtar, 12 kalıbrli oqtar tárkilengen. Sondaı-aq, 1,5 tonnadan astam balyq pen 425 kılogramm ystalǵan balyq alynǵan.
«Kúdikti retinde 3 adam qamaýǵa alynyp, 7 adam «eshqaıda ketpeý týraly qolhatpen» jiberilgen. Qylmystyq toptyń qatysýshylar ózderine belgilengen áreketterdi jasaǵan. Balyqshylar zańsyz balyq aýlap, satyp alýshylarǵa ótkizgen. Óz kezeginde olar balyqtardy Shymkent qalasynyń bazarlarynda satqan. Sondaı-aq, balyq satyp alýshylar balyqshylarǵa materıaldyq kómek berip otyrǵan. Kúdiktilerdiń arasynda eki otbasy bar. Sotqa deıingi tergeý amaldary jalǵasýda»,-dedi polıtsııa podpolkovnıgi.
