Túrkistan oblysynda úıirmeleri tegin sport zal ashyldy

TÚRKІSTAN. QazAqparat - Túrkistan oblysynyń Qazyǵurt aýdany Qaqpaq aýylynda balalarǵa arnalǵan qaıyrymdylyq sport zaly ashyldy. «Qazaqstan halqyna» qorynyń jobasy aıasynda aýyl balalary sport sektsııalaryna tegin qatysa alady, dep habarlaıdy QazAqparat.

Jańa sport zal jergilikti mektep aýmaǵynda irge qalaǵan. Zal bólmesi mektep balansynda. Osyǵan deıin aýyl balalary kúres úıirmesine barǵanymen, turaqty jattyǵýlar ótkizý úshin qajetti jaǵdaı jasalmaǵan edi. Sondyqtan turǵyndar, ásirese, balalar jańa zaldyń ashylýyn asyǵa kútti.

«Qazaqstan halqyna» qory «Batyr bolamyn» QQ-men birlesip júzege asyryp jatqan jobany estip, aýyl azamattary bolashaq zal ashylatyn ǵımaratty óz kúshterimen jóndeýden ótkizdi.

«Qazaqstan halqyna» qorynyń qoldaýymen úı-jaı qajetti zamanaýı jabdyqtarmen, sporttyq qurylǵylarmen jáne jattyǵýǵa arnalǵan quraldarmen jaraqtandyryldy. Jańa sport zalda 80 bala erkin kúrespen aınalysýdy bastap ketse, boks sektsııasyna qabyldaý júrip jatyr.

«Biz zaldyń ashylýyn asyǵa kúttik. Apta saıyn jattyǵamyz. Bárimizge qatty unaıdy. Qaladaǵydaı zaldardaı óte keń jáne zamanaýı. Osyndaı sport zaldy ashqan aǵalarymyzǵa raqmet!», – deıdi sektsııaǵa qatysýshylardyń biri Dosjan Azamat.

Qaqpaq aýylyndaǵy bul nysan - «Qazaqstan halqyna» qoǵamdyq qorynyń «Batyr bolamyn» qorymen seriktestikte «24 balalar sport zaly» qaıyrymdylyq jobasy aıasynda ashqan toǵyzynshy sport zal.

Eske salsaq, «Qazaqstan halqyna» qory bastamashylyq etken «24 balalar sport zaly» qaıyrymdylyq jobasy elimizdiń shalǵaıdaǵy eldi mekenderinde nemese sportqa qoljetimdilik deńgeıi tómen aýyldyq jerlerde balalar sportynyń qoljetimdiligin arttyrýǵa baǵyttalǵan. Jobanyń maqsatty aýdıtorııasy – az qamtylǵan jáne kóp balaly otbasylardan shyqqan 5 jastan 18 jasqa deıingi balalar, sondaı-aq damý ereksheligi (ınklıýzıvtiligi) bar jetkinshekter.

24 zaldy ashýǵa qor 183 623 000 teńge bóldi.

Foto: qazaqstanhalqyna.kz