Túrkistan oblysynda úı men aýlalardy jańbyr sýynan tazartý jumysy júrip jatyr
TÚRKІSTAN. QazAqparat - Jetisaı men Maqtaral aýdandarynda turǵyn úıler men aýlalardy jańbyr sýynan tazartý jumystary júrip jatyr, dep habarlaıdy QazAqparat tilshisi.
Osydan eki-úsh kún buryn tolassyz jaýǵan jańbyr Túrkistan oblysyndaǵy Jetisaı men Maqtaral aýdandarynyń turǵyndaryn ábigerge salǵan bolatyn.
Aýlalar men kóshelerdi, tipti turǵyn úılerdiń mańaıyn jańbyr sýy basyp, qolaısyzdyq týdyrdy.
Qazirgi kezde Tótenshe jaǵdaı departamentiniń jeke quramy men jergilikti atqarýshy organdardyń qyzmetkerleri táýlik boıy qyzmet atqarýda.
«Bul jaǵdaı boıynsha Túrkistan oblysy TJD jedel shtab quryldy. Úılerdi sý basý qaýpi joq. Jeke quram qyzmetkerleri motopompalarmen sý arnasyn burý, jınalǵan sýdy sorý jumystaryn atqaryp jatyr. Qazir kósheler men aýla aýmaqtarynda sý sorý jumystary jalǵasýda. Qazirgi deıin barlyǵy 10 000 astam tekshe metr sý tartyldy», - deıdi Túrkistan oblysy TJD departamentiniń baspasóz hatshysy Shyńǵys Súleımenov.
Qos aýdandaǵy jaǵdaıǵa baılanysty aýdandyq jastar resýrstyq ortalyǵynyń uıymdastyrýymen qurylǵan erikti jastar da turǵyndarǵa kómek kórsetip júr.
