Túrkistan oblysynda ustazdar oqýshynyń ornyna test tapsyrmalaryn oryndap bergen

TÚRKІSTAN. QazAqparat – Túrkistan oblysynda memlekettik attestattaý barysynda zań buzýshylyqqa jol bergen mektep dırektory sógis aldy, dep habarlaıdy QazAqparat tilshisi.

Oqıǵa Keles aýdanynda bolǵan. №43 «Bolashaq» jalpy orta mektebinde ótken memlekettik attestattaý barysynda ustazdar zań buzýshylyqtarǵa jol bergen.

Túrkistan oblysynyń bilim salasyndaǵy sapany qamtamasyz etý departamentiniń qyzmetkerleri ájethanaǵa suranyp shyqqan oqýshynyń tapsyrmalary kompıýterdi qashyqtan basqarý arqyly oryndalǵanyn anyqtady.

«Vıdeoda 13-shi suraq belgilenbegen qalpynda tur jáne qyzyl belgini kórsetip tur. Oqýshy parol logınimen qaıta kirse 13 suraq belgilengen. Pedagogter qaýymyn ádildikke, adaldyqqa shaqyramyz. Bolashaq urpaqty adal bilim men tárbıege baýlýǵa, oqýshylardyń boıyna jaman ádetterdi sińirmeýge, ońaı jolmen baǵa alýdy úıretpeýge shaqyramyz», - deıdi Túrkistan oblysynyń bilim salasyndaǵy sapany qamtamasyz etý departamentiniń basshysy Ǵalymjan Almatov.

Atalǵan oqıǵa boıynsha mektep dırektoryna sógis túrindegi tártiptik jaza qoldanyldy.