Túrkistan oblysynda úsh kúnde brakonerlikke qatysty 43 jaıt anyqtaldy
TÚRKІSTAN. QazAqparat - Túrkistan oblysynyń polıtseıleri «Brakoner» jedel-profılaktıkalyq is-sharasy barysynda 40-tan astam quqyq buzýshylyqty anyqtady. Bul jóninde óńirdiń polıtsııa departamentine silteme jasap QazAqparat habarlaıdy.
Túrkistan oblysynda 6 qańtar-5 aqpan aralyǵynda «Brakoner» jedel-profılaktıkalyq is-sharasy ótip jatyr. Atalǵan is-sharanyń negizgi maqsaty - tabıǵatty qorǵaý zańnamasy salasyndaǵy quqyq buzýshylyqtar men qylmystardyń aldyn alý, anyqtaý jáne jolyn kesý, zańsyz ań jáne balyq aýlaý, aǵash kesý jáne ózge de quqyq buzýshylyqtardy boldyrmaý.
«Brakoner» is-sharasy bastalǵan úsh kún ishinde tabıǵatty qorǵaý polıtsııasy qyzmetkerleri 43 ákimshilik quqyq buzýshylyqty anyqtady. Atalǵan tabıǵat qorǵaý zańnamasyn buzýshylarǵa 165 myń teńgeden astam aıyppul salyndy.
Reıd barysynda tártip saqshylary janýarlar dúnıesin paıdalaný talaptary men ań aýlaý erejelerin buzýdyń 30 jaıtyn, balyq aýlaý jáne balyq resýrstary men basqa da sý janýarlaryn qorǵaý salasyndaǵy 9 ákimshilik quqyq buzýshylyq deregin jáne basqa da quqyq buzýshylyqtardy anyqtady.
Sondaı-aq «Brakoner» jedel-profılaktıkalyq is-sharasy barysynda polıtseıler brakonerlerden tirkelmegen 2 ańshy myltyǵy, 20 kg zańsyz aýlanǵan balyq, 1 qaıyq jáne 200 m jýyq balyq aýlaý jelisin tárkiledi.
