Túrkistan oblysynda úsh kúnde 4 myńǵa jýyq júrgizýshi jol erejesin buzǵan
TÚRKІSTAN. QazAqparat – Túrkistan oblysynda jol-qaýipsizdigi erejelerin 4 myńǵa jýyq júrgizýshi buzǵan. Jol erejesin buzý jáıtteri úsh kúndik «Qaýipsiz jol» jedel-profılaktıkalyq is-sharasy barysynda anyqtalǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, óńirde jol-kólik oqıǵalarynyń aldyn alý jáne júrgizýshiler arasynda kólik tártibin arttyrý, jol-kólik oqıǵalaryn jáne apattardy azaıtýǵa baǵyttalǵan reıdter uıymdastyrylýda. Osy maqsatta ótkizilgen sharada 75 qoǵamdyq kólik júrgizýshisiniń ereje buzǵanyn anyqtaǵan.Tártip saqshylary kólik quralyn mas halde basqarý boıynsha 32 jaıtty tirkegen. Al, jyldamdyqty arttyrǵany úshin ákimshilik jaýapkershilikke 217 júrgizýshini tartylǵan. Qarama-qarsy qozǵalys jolaǵyna shyǵý boıynsha 25 , manevr jasaý erejelerin buzýshylardyń 156 jáıti jáne baǵdarshamnyń tyıym salynǵan dabylynan ótý boıynsha 55 derek anyqtalǵan. Sondaı-aq, kólik quraldaryn basqarý kezinde uıaly telefondardy paıdalanǵany úshin 369 júrgizýshi jazalanǵan jáne 754 qaýipsizdik beldikterin paıdalanbaǵandar aıqyndalǵan. Oǵan qosa, 87 júrgizýshi jaıaý júrginshiniń júrisine basymdyq bermegeni úshin jáne 605 jaıaý júrginshi jol júrý erejesin buzǵany úshin jaýapkershilikke tartylǵan. Sonymen qatar, kólik quraldaryn basqarý quqyǵynan aıyrylǵan 253 júrgizýshi ákimshilik jaýapkershilikke tartylǵan.
«Reıdtik is-shara barysynda patrýldik polıtsııa qyzmetkerleri avtokólikti zańsyz jabdyqtaýdyń 25 jaıtyn jáne tehbaıqaýdan ótpegen 113 derekti, kólik quralyn reıs aldyndaǵy tekserý men medıtsınalyq tekserýden ótpegen 6 jaıtyn, 14 zańsyz jolaýshy tasymaldaý deregin anyqtady. Odan bólek, Túrkistan oblysy PD jergilikti polıtsııa qyzmeti polıtseıleri «Qaýipsiz jol» jedel-profılaktıkalyq is-sharasy barysynda jol-kólik oqıǵalarynyń aldyn alý jáne qatysýshylar arasynda jolda júrý qaýipsizdigi boıynsha saýattylyǵyn arttyrý boıynsha túsindirme áńgime júrgizip, JQE jazylǵan eskertpe qaǵazdary taratyldy» delingen habarlamada.
