Túrkistan oblysynda úsh kúnde 21 mas júrgizýshi ustaldy

Óńirdiń tártip saqshylary úsh kún boıy júrgizilgen «Qaýipsiz jol» jedel-profılaktıkalyq is-sharasyn qorytyndylap, 3715 jol qozǵalysy erejesin buzý jaıtyn tirkedi, dep habarlaıdy QazAqparat.

Oblystyq Polıtsııa departamentiniń málimetinshe, atalǵan sharaǵa patrýldik polıtsııanyń 500-den astam qyzmetkeri men ýchaskelik ınspektory, basqa da múddeli organdardyń ókilderi qatysty.

Polıtseıler shara barysynda kólik quralyn mas kúıde basqarý, jyldamdyqty shekten tys arttyrý, manevr jasaý erejesin buzý, qarsy baǵytqa shyǵý, qıylystar men jaıaý júrginshiler ótkelderinen ótý kezinde tártip saqtamaý, tehnıkalyq teksrýden ýaqytynda ótý sııaqty quqyqbuzýshylyqtarǵa erekshe nazar aýdardy.

Reıd barysynda jol erejesin óreskel buzǵan 122 qoǵamdyq kólik júrgizýshisi anyqtaldy. Sonymen qatar, mas kúıinde kólik júrgizgen júrgizýshilerge qatysty ákimshilik hattama toltyrylyp, avtokólikteri aıyp turaǵyna qoıyldy. Jyldamdyqty shekten tys asyrǵan 92 júrgizýshi men joldyń qarsy betine shyqqan 18 turǵynǵa hattama toltyryldy. Budan ózge, manevr jasaý erejesin buzǵan - 80, baǵdarshamnyń tyıym salynǵan belgisine ótken - 52, avarııalyq jaǵdaı jasaǵan 17 jáne temirjol ótkelderinen ótý erejelerin buzǵan 10 júrgizýshi ákimshilik jaýapqa tartyldy. 628 adam jol qozǵalysy erejesin buzyp, qaýipsizdik beldigin taqpaǵany, 235 adam kólik basqarý kezinde uıaly telefondaryn paıdalanǵany úshin aıyppul tóleıtin boldy.

Kólik quralyn basqarý quqyǵy joq 366 júrgizýshige jáne jaıaý júrginshilerdi ótkizbeı qoıǵan 71 júrgizýshige tıisti shara qoldanyldy.

Reıd barysynda tártip saqshylary avtokólikti zańsyz qaıta jabdyqtaýdyń 27 jaǵdaıyn, jalǵan nómir taǵyp júrýdiń 2 faktisin, qoǵamdyq kólik júrgizýshileriniń medıtsınalyq tekserýden ótpeı reıske shyǵýynyń 7 faktisin tirkep, tehnıkalyq baıqaýdan ótpegen 138 júrgizýshini anyqtady.

Belgilenbegen jerde joldy kesip ótkeni úshin 671 jaıaý júrginshi ákimshilik jaýapqa tartyldy.

Polıtseıler aıyp turaǵyna barlyǵy 141 kólik quralyn qoıyp, jol erejesin buzǵan 15 memlekettik nómirdi aldy. Shara sońynda jol qozǵalysy erejelerin mindetti túrde saqtaý týraly 1000-ǵa tarta jadynamalar men paraqshalar taratyldy.