Túrkistan oblysynda úsh birdeı kólikti soqqan júrgizýshi qamaýǵa alyndy
TÚRKІSTAN. QazAqparat - Túrkistan oblysynda qujatsyz, mas kúıde kólik basqaryp kele jatyp, úsh birdeı kólikti soqqan júrgizýshi qamaýǵa alyndy. «Audi B4» avtokóligin tizgindegen turǵyn oqıǵa ornynan qashyp ketpek bolǵan, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, kólikteri soǵylǵan júrgizýshiler polıtsııany shaqyrtqan. Tártip saqshylary shuǵyl áreketke kóship, qashqan kóliktiń sońynan eredi. Sóıtip, qashyp bara jatqan júrgizýshini oqıǵa ornynan 10 shaqyrym jerden qolǵa túsirgen.
Ol Maqtaaral aýdanynyń turǵyny bolyp shyqty. Belgili bolǵandaı, keshki saǵat 18:00 shamasynda «Audi B4» markaly kólikti tizgindegen ol, aldymen bir kólikti jol boıynda qysyp, soǵyp ketken. Artynsha ekinshi kólikti qaǵyp, kelesisin basyp ozbaq bolǵan. Sóıtip úshinshisin túıip ótken. Úsh mashınaǵa da materıaldyq shyǵyn keltirildi.
Kináli júrgizýshiniń qujattaryn tekserý kezinde, onyń mas halde ekendigi anyqtalǵan. Arnaıy medıtsınalyq kýálandyrýdyń qorytyndysy onyń ishimdik iship alǵanyn rastady. Júrgizýshiniń buǵan deıin de mas hálde kólik basqarǵany úshin júrgizýshi kýáliginen aıyrylǵany belgili boldy. ıAǵnı Jetisaı aýdandyq sotynyń qaýlysymen QR ÁQBtK-niń 608-babymen kináli dep tanylyp, 5 jyl merzimge kólik quralyn basqarý quqyǵynan aıyrylǵan.
«Qazirgi tańda atalǵan jaıt QR QK-niń 346 baby 1-bóligimen tirkelip, qylmystyq is qozǵaldy. Oǵan qosa qujatsyz kólik basqarǵany úshin QR ÁQBtK-niń 612-baby 2-bóligimen ákimshilik hattama toltyryldy. Tergep-tekserý amaldaryn Jetisaı APB-niń aǵa anyqtaýshysy polıtsııa kapıtany Baǵlan Nazarqulov júrgizýde. Kúdikti qamaýǵa alyndy», - delingen habarlamada.
