Túrkistan oblysynda úsh aýysymdy mektepterdiń máselesi sheshiledi - Janseıit Túımebaev
TÚRKІSTAN.QazAqparat - Túrkistan oblysynda aǵymdaǵy jyly 26 bilim berý nysany iske qosylady. Osylaısha óńirdegi 4 apatty jáne 4 úsh aýysymdy mektepterdiń máselesi sheshiledi. Bul másele oblys ákimi Janseıit Túımebaevtyń el aldyndaǵy eseptik jıyny kezinde aıtyldy, dep habarlaıdy QazAqparat tilshisi.
Aımaq basshysynyń aıtýynsha, ótken jyly bilim berý salasyna 250,3 mlrd bólingen. Osy qarajattardyń arqasynda oblysta jańadan 120 bala baqsha ashylyp, jalpy mektepke deıingi bilim berý uıymdary sany 1 399-ǵa jetken. Sondaı-aq, óńirde apatty jáne úsh aýysymdy mektepterdiń máselesi de óz sheshimin taba bastaǵan.
«Ótken jyly 20 mlrd teńgege 80 bilim berý nysanynyń qurylysy júrgizilip, 39-nyń qurylysy aıaqtaldy. Onyń ishinde, 8 apatty jáne 5 úsh aýysymdy mektepterdiń máselesi sheshildi. Máseleniń oń sheshim tabýy oqýshylarymyzdyń oqý úlgerimine de oń áser etetini sózsiz. Oblystyq bıýdjet esebinen kolledjderde balalardy tegin oqytýǵa 11,3 mlrd teńge bólindi»,- dedi Janseıit Túımebaev.
Oblys ákiminiń málimetinshe, adamı faktordy azaıtyp, sybaılas jemqorlyqtyń aldyn alý úshin bilim salasynda elektrondy qyzmet kórsetý kúsheıtilýde. Máselen, oblystaǵy barlyq mektepke jumysqa jumys.sitcen.kz saıty arqyly sońǵy alty aıda 3 myńǵa jýyq adam, onyń ishinde 1336 muǵalim qyzmetke ornalasqan. Al, tehnıkalyq qyzmetkerlerdi jumysqa qabyldaý aýtsorsıngke berilip, mektep basshylyǵy múldem qatyspaıtyn bolǵan. Qazir 1008 tehnıkalyq qyzmetker jumysqa ornalasqan.
«Halyq arasynda "shapka berý" dep atalyp ketken jemqorlyqty túbegeıli joıýdy jalǵastyramyz. Elektrondy júıe arqyly balalardy bala baqsha men mektepke ornalastyrý úshin Balabagsha.sitcen.kz jáne mektep.sitcen.kz júıesi jumys isteıdi»,- dedi aımaq basshysy.
