Túrkistan oblysynda úsh aýdanda mal urlaǵan qylmystyq top ustaldy
TÚRKІSTAN. QazAqparat - Túrkistan oblysynda úsh aýdanda mal urlaǵan qylmystyq top músheleri ustaldy. 4 adamnan quralǵan top Ordabasy, Qazyǵurt jáne Arys aýdandarynda tórt túlikti qoldy etip kelgen, dep habarlaıdy QazAqparat tilshisi.
Oblystyq PD málimetinshe, qazan-qarasha aılarynda Ordabasy aýdanyndaǵy jaıylymdardan jylqylar men qara maldar urlana bastaǵan. Osy jaǵdaıǵa baılanysty tájirıbeli krımınaldyq polıtsııa qyzmetkerlerinen arnaıy top qurylyp, oblys aýmaǵyndaǵy bazarlarda urlanǵan mal etiniń satylýy boıynsha reıdtik is-sharalar júrgizildi.
Tártip saqshylary Badam aýyly mańynda jaıylyp júrgen úsh jylqynyń qasynda «Folksvagen» avtokóligin baıqaıdy. Tekserý barysynda, olardyń jylqylardy urlamaq bolǵany anyqtalǵan. Tulǵalaryn tekserý kezinde top músheleriniń ekeýi buryn sottalǵany, ustalǵandardyń 21 urlyq jáıtine qatystylyǵy belgili boldy. 60-tan astam jylqy men sıyr urlap, 8 mıllıon teńge kóleminde nyǵyn keltirgeni dáleldendi. Olar túngi mezgilde jaıylymnan maldardy urlap, soıyp otyrǵan. Etterin bólshektep, oblys bazarlaryna satqan. Sondaı-aq, jedel izdestirý sharasy kezinde urlanǵan maldardyń etin alypsatar satýshy da ustaldy. Polıtseıler qazirgi tańda mal urlyǵyna qatysty taǵy eki kúdiktini izdestirip jatyr.
Aıta keteıik, jyl basynan beri óńirde mal urlyǵynyń 300-den asa jaıty tirkelip, oblys aýmaǵynda mal urlyǵymen aınalysqan 14 qylmystyq top quryqtalǵan.
