Túrkistan oblysynda usaq maldan sibir jarasy tirkeldi

TÚRKІSTAN. QazAqparat - Túlkibas aýdany, Shaqpaq aýyl okrýgi, Shaqpaq baba eldi mekeninde bir usaq maldan sibir jarasy tabyldy, dep habarlaıdy QazAqparat tilshisi.

Shaqpaq baba eldi mekeniniń usaq maldaryn baqtashy aýyldan 4-5 shaqyrym jerde baǵyp júrgen. Sonyń ishinde 7 aılyq toqty sibir jarasyn juqtyrǵan degen kúdik bolǵan. Keıin mamandar tarapynan júrgizilgen saraptama oń nátıje berdi.

«Oryn alǵan oshaqtaǵy 504 bas ýaq malmen 1 bas jylqyǵa vaktsına jáne 60 000 myń ml glıýzamın VET zalalsyzdandyrý preparaty bólinip, eldi mekennen 4 shaqyrym qashyqtyqtyqta ornalasqan 1000 sharshy metr qorajaı aýmaǵyna búrký arqyly dezınfektsııa jumystary júrgizildi. Aýyl turǵyndary jáne aýyl sharýashylyǵy janýarlary arasynda «Sibir jarasy» aýrýynyń belgileri tirkelmegenin, oblys kóleminde epızootııalyq jaǵdaı turaqty ekenin habarlaımyn» - delingen Túrkistan oblysy veterınarııa basqarmasy usynǵan aqparatta.