Túrkistan oblysynda urylar sý qubyrynyń 80 qaqpaǵyn urlap ketken
TÚRKІSTAN OBLYSY. QazAqparat - Saıram aýdandyq polıtsııa bólimine belgili fırma basshysynan aryz kelip túsken. Onda mekemege tıesili 80 dana sý qubyrynyń qaqpaqtaryn 1 aıǵa jýyq ýaqyt ishinde belgisiz tulǵalar urlap ketkeni aıtylǵan, dep habarlaıdy Túrkistan oblystyq Polıtsııa departamentiń baspasóz qyzmeti.
Árqaısysynyń quny 13 000 teńge bolatyn qaqpaqtar úshin jábirlenýshi mekemege keltirilgen shyǵyn kólemi 1 mıllıon teńgeden asady.
Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 188-baby (urlyq) boıynsha tirkeledi. Oryn alǵan múlik urlyǵyn ashý maqsatynda Saıram APB krımınaldy polıtsııa bólimi, jergilikti polıtsııa qyzmeti, ýchaskelik polıtsııa ınspektorlary qyzmetkerlerinen arnaıy top qurylyp, olar shuǵyl iske kiristi.
Jedel-izdestirý jumystary júrgizildi. Urlyqqa beıim azamattardy tekserip, jaqyn aımaqtardy aralady, kórgen-bilgenderden surastyrdy. Nátıjesinde, beınekameradan kúdiktilerdiń beınesi tabylyp, kúdiktilerdiń ekeýi ustaldy. Úshinshisi izdestirilýde. Kúdiktiler jergilikti turǵyndar bolyp shyqty.
Tergeý barysynda kúdiktilerdiń bireýi qamaýǵa alynyp, ekinshi sybaılasynan qolhat alyndy. Belgili bolǵandaı, kúdiktiler kez-kelgen kóshedegi sý qubyrynyń qaqpaqtaryn urlap áketip, temir alatyn oryndarǵa bólip-bólip, syndyryp satyp otyrǵan. Aqshasyn óz qajettiligine jaratqan. Qazirgi tańda sotqa deıingi tergeý amaldary júrgizilýde.
