Túrkistan oblysynda «Ulttyq mektep lıgasy» bastaldy
TÚRKІSTAN. QazAqparat - Túrkistanda «Ulttyq mektep lıga» sport jarystarynyń ashylý rásimi ótti, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Pandemııa saldarynan bolǵan úzilisten keıin komandalyq sport saıysy Túrkistan qalasynda bastaldy. Tórt komanda baq synaıtyn irikteý týry tórt kúnge jalǵasady. Saıys kezinde barlyq karantın talaptary qatań saqtalady. Qatysýshylardyń dene qyzýy tekserilip, araqashyqtyq saqtalǵan. Ulttyq mektep lıgasy aıasynda voleıboldan mektep oqýshylary arasynda uıymdastyrylǵan qalalyq irikteý oıyndaryn tamashalaýǵa kelgen Túrkistan oblysynyń ákimi Ómirzaq Shókeev oqýshylarǵa sáttilik tiledi.
«Adal jáne jigerli kúsh synasýda jeńiske degen úmitterińizdi úzbeńizder. Udaıy shyńdalyp, sheberlik pen mashyqty jınaqtaýǵa umtylyńyzdar. Aldaǵy ýaqytta Týymyzdy árdaıym, álemniń barlyq aımaǵynda jańa jeńistermen jelbiretip, sizderge amanat eter eń basty baılyǵymyz, bizdiń barsha tabystarymyzdyń kilti – el birligin saqtaýǵa kúsh salýlarýyńyzǵa tilektespin», – dedi oblys ákimi.
Ulttyq mektep lıgasy aıasynda fýtbol, basketbol, gandbol, voleıbol sport túrlerinen ótetin jarysta oqýshylarǵa sport mektebinen bapker, kásibı maman bekitilgen. Lıga jarystary chırlıdıng, ıaǵnı úılesimdi sport túri formatynda uıymdastyrylady. Ár mektep komandalarynyń óz logotıpteri men urandary jasalǵan. Komandalar arnaıy sporttyq formalarymen qamtamasyz etilgen. Mektep oqýshylaryn jarysqa arnaıy avtobýstar tasymaldaıdy.
Ulttyq mektep lıga jarystarynyń negizgi maqsaty – jasóspirimder arasynda buqaralyq sportty damytý, salaýatty ómir saltyn nasıhattaý, oqýshylardyń bos ýaqytyn tıimdi uıymdastyrý. Lıga jarystary barysynda jasóspirimder arasynda komandalyq rýh qalyptastyrý jáne aýyldyq, aýdandyq, oblystyq deńgeıde qoǵam ómirine belsene atsalysatyn lıder, kóshbasshylardy toptastyrý. Oblystyq spartakıadanyń kezeńi qańtar aıynda mektepishilik komanda jasaqtalyp, aýdandyq chempıon komanda anyqtalady.
Bul lıgada oblystaǵy eń úzdik degen sportshy oqýshylary óner kórsetedi. Jeńimpaz bolǵan sport komandasy, oblystyq, respýblıkalyq, halyqaralyq mektep oqýshylary arasynda sporttan jarystarǵa qatysyp, el namysyn qorǵaıdy. Naýryz aıynda oblystyq chempıonatta ár aýdan, qaladan úzdik komandalar ózara oblystyq irikteýge qatysyp, chempıon komandalar marapattalady.
