Túrkistan oblysynda túıe sharýashylyǵyn damytý qolǵa alynbaq
Óńirde túıe sharýashylyǵyn damytý boıynsha is-sharalar jospary qabyldanyp, aǵymdaǵy jyly 4 myń bas analyq túıe satyp alý josparlanýda, dep habarlaıdy QazAqparat tilshisi.
Oblys ákimi Ómirzaq Shókeevtiń aıtýynsha, sharýalarǵa túıe satyp alýǵa tómendetilgen paıyzben nesıe berý máselesi sheshilgen.
«Aımaqta «Golden Camel Group LTD» JShS-men túıe súti lıtrin 1000 teńgeden qabyldaýǵa kelisim jasalǵan.
Atalǵan joba 9 - 10 aıda tolyq aqtalady. Sondaı-aq, «Maqta sharýashylyǵyn damytý» is-sharasy aıasynda qazirgi tańda, mınıstrlikpen birlesken jumys toby qurylyp, maqta salasyn damytý boıynsha arnaıy baǵdarlama ázirlenýde. Nátıjesinde maqta óńdeý zaýyttarynyń tehnologııasy jańartylyp, aınalym qarajattary tolyqtyrylady. Maqta baǵasyn naryqtyq retteýge qol jetkiziletin bolady»,- dedi eseptik jıynda Ómirzaq Shókeev.
Óńir basshysynyń sózinshe, Ordabasy, Báıdibek, Otyrar aýdandary men Kentaý, Túrkistan qalalary sońǵy 10 jyldan beri aǵyn sý tapshylyǵyn sezinýde. Bul máseleni sheshý úshin Qazaqstan Respýblıkasy Úkimetiniń qaýlysymen 6 sý nysandary oblystyq menshikke qabyldanyp, «Bógen arnasy» memlekettik mekemesi qurylǵan. 34 dana tehnıkamen qamtamasyz etildi. Atalǵan nysandardyń qatarynda «Bógen» sý qoımasy, «Qosqorǵan» sý qoımasy, «Túrkistan» magıstraldy kanaly, «Arys» magıstraldy kanaly jáne «Qaraspan» magıstraldy kanaly, «Qaraspan» sý toraby bar. Keshendi jospar aıasynda 5 iri sý nysanynyń qurylys jumystary bastalyp, nátıjesinde qosymsha 196,0 m3 aǵyn sý jetkiziletin bolady.
