Túrkistan oblysynda týrızm jáne kásipkerlikti damytý máselesi talqylandy
TÚRKІSTAN.QazAqparat - Túrkistan oblysynda aımaq basshysy Janseıit Túımebaevtyń tapsyrmasyna sáıkes týrızm jáne kásipkerlikti damytý jumystary qarqyndy júzege asyrylýda.
Osy maqsatta Keles aýdanynda «Túrkistan» ÁKK fılıaly «Turkistan Invest» kompanııasynyń dırektory Narıman Іlııasov pen ınvestıtsııa tartý boıynsha atqarýshy dırektory Madııar Danııarov kóshpeli semınar ótkizdi, dep habarlaıdy QazAqparat tilshisi.
Basqosýǵa aýdandaǵy 12 aýyldyq okrýktiń ákimderi qatysty. Semınar barysynda aýdan ákiminiń orynbasary Abaı Jańbyrbaev kásipkerlik nysandar men týrızm salasyn damytýǵa yńǵaıly jerlerdi tanystyrdy. Týrızm jáne kásipkerlikti damytý salalary boıynsha ákimder tarapynan usynystar men jobalar usynyldy. Jıyn sońynda «Turkistan Invest» fılıalynyń ókilderi aýdan turǵyndarynyń eńbekqorlyǵyn jáne jerdiń qunarlyǵyn aıta kete, bul óńirge ınvestorlardy tartý yńǵaıly ekenin jetkizdi. Aldaǵy ýaqytta Keles aýdany kásipkerlik óńirine aınalýyna múmkindigi mol ekenin atap ótti.
Aıta keteıik, jańadan qurylǵan aýdanda kásipkerlik salasy birtindep qarqyn alyp keledi. Búginde Jýantóbe eldi mekenindegi «TM-Stroı-21» JShS-niń jip ıirý jáne qysh zaýyttary ashylyp, jumys isteýde. Jobanyń jalpy quny - 250 mln teńge, óndiris orny jylyna 1000 tonna press jibin daıyndaıdy.
Al jobalyq quny 160 mln teńgeni quraıtyn qysh zaýytynyń jyldyq qýaty 32,4 mln dana bolmaq. Bıyl qurylysy bastalǵan óndiris orny 2020 jyly tolyq iske qosylady. Sondaı-aq, Qoshqarata aýyldyq okrýgindegi «Qaınar» JShS-niń tyń jobasy qolǵa alynǵan. Jobanyń negizgi baǵyty - qymyz óndirý jáne at sportyn damytý bolyp tabylady. Búginde seriktestik jalpy sany 50 saýyndy bıeden kúnine 150-200 lıtr qymyz óndirip otyr.
