Túrkistan oblysynda týrızm qalaı damýda
Aımaq basshysynyń aıtýynsha, Túrkistan qalasyn damytý baǵytynda 2019 jyly 23 nysannyń qurylys jumystary bastalǵan. Búgingi tańǵa ákimshilik-iskerlik ortalyǵynda 14 nysannyń qurylys jumystary tolyq aıaqtalǵan. Oblys ákimi bıyl týrıster aǵyny men kelýshiler sanyn 2 mıllıon adamǵa deıin artatynyn aıtty. Osy jyly «Kerýen Saraı» týrıstik kesheni ashylyp, «Qasqasý týrıstik-rekreatsııalyq kesheni» jobasyn iske asyrylady. Túrkistan, Shymkent jáne Tashkent arasynda joǵary jyldamdyqty temirjol jobasy júzege asyrylmaq.
«Týrızmdi halyqaralyq deńgeıde damytý maqsatynda Ózbekstan men Qazaqstan óńiraralyq yntymaqtastyǵynyń forýmy aıasynda Úkimet basshylarynyń qatysýymen Tashkent, Samarqand, Buhara oblystary men Túrkistan oblysy quramdastyrylǵan týrlardy ázirleý jáne olardy álemdik naryqtarda ilgeriletý boıynsha tórt jaqty kelisimge qol qoıyldy. Bıyl Túrkistan, Shymkent jáne Tashkent arasynda joǵary jyldamdyqty temirjoldyń jobasy júzege asyrylatyn bolady. Bul jobany iske asyrý eki el arasyndaǵy ekonomıkalyq yntymaqtastyq pen týrızmdi damytýǵa oń áser beredi», - dedi oblys ákimi.
Túrkistan qalasyn túrki áleminiń rýhanı ortalyǵyna aınaldyrý jáne týrısterdi tartý maqsatynda Q.A.ıAsaýı kesenesiniń aınalasynda ashyq aspan astyndaǵy murajaı, amfıteatr jáne mádenı demalys oryndary qyzmet kórsetýde. Qazaqstandaǵy týrızm salasyndaǵy kadrlardyń qajettiligin jáne qalada kórsetiletin qyzmetterdiń sapasyn arttyrýdy eskere otyryp, Túrkistanda Halyqaralyq týrızm jáne qonaqjaılylyq ýnıversıteti ashylǵan.
«Oblysymyz tarıhı jáne mádenı nysandarǵa baı ólke. Óz kezeginde óńirde Túrkistan, Kentaý qalalary men Otyrar, Ordabasy, Báıdibek aýdandary baǵytynda tarıhı-tanymdyq týrızmi, Saryaǵash kýrorty aýmaǵynda emdik-saýyqtyrý týrızmi, Túlkibas, Tólebı, Qazyǵurt aýdandarynda ekologııalyq týrızm túrleri qarqyndy damyp keledi. Sonyń biri retinde týrızmdi damytýdaǵy alar orny erekshe «Qasqasý týrıstik-rekreatsııalyq kesheni» jobasy iske asyrylýda»,- dedi Ómirzaq Shókeev.
Budan bólek, Túrkistan qalasynyń tarıhı ortalyǵynda jergilikti halyqpen týrısterge oblystyń týrıstik nysandary, onyń ishinde tarıhı-mádenı, emdik-saýyqtyrý, tabıǵı oryndary boıynsha «Bir tereze» qaǵıdasymen aqparat usynatyn «Qabyldaý Ortalyǵy» ashylǵan. Onda týrıster tek qana aqparat alyp qana qoımaı, óńirdiń tarıhymen jáne qaladaǵy ornalastyrý, tamaqtaný oryndary boıynsha aqparattar ala alady. Qazirgi ýaqytta qalanyń tarıhı ortalyǵynyń aýmaǵynda jeke ınvestıtsııalar esebinen respýblıkada teńdesi joq kópfýnktsıonaldy «Kerýen Saraı» týrıstik kesheniniń qurylysy júrgizilýde. Investıtsııa kólemi – 88 mlrd teńgeni quraıdy. Shyǵys úlgisinde salynǵan biregeı keshende qolónershileri bar jabyq bazarlar, shyǵys bazary, saýda ortalyqtary, gandola qaıyqtarynyń júzýine arnalǵan sý arnalary, oıyn-saýyq ortalyǵy, sondaı-aq halyqaralyq deńgeıdegi qonaq úıler jumys isteıtin bolady. Joba óńir ekonomıkasyn damytýǵa eleýli úles qosyp, 600 jańa jumys oryndary ashylady dep josparlanǵan.
