Túrkistan oblysynda týrıster tasymaldaıtyn 2 qabatty elektrli avtobýstar jolǵa shyǵady
TÚRKІSTAN. QazAqparat - Túrkistan oblysy ákimi Ómirzaq Shókeev pen qytaılyq «BYD» kompanııasynyń ókilderi kezdesti.
Taraptar Túrkistan qalasynda shoǵyrlanǵan tarıhı-mádenı ortalyqtarǵa týrısterdi tasymaldaý úshin Qazaqstanǵa ekologııalyq jaǵynan taza kólikterdi jetkizý máselesin talqylady, dep habarlaıdy QazAqparat Túrkistan oblysy ákimdiginiń baspasóz qyzmetine silteme jasap.
Jıyn barysynda oblys ákimi óńirge keletin týrıster men zııarat jasaıtyn adamdar sanynyń jyl saıyn artýyn tilge tıek etip, olarǵa jasalatyn qolaıly jaǵdaıdyń da jaqsarýy qajettiligin aıtty.
Mysalǵa, 2018 jyly Túrkistan oblysyna 1,5 mln týrıst kelse, bıyl bul kórsetkish 1,7 mln adamǵa jetedi dep kútilýde.
Sonymen qatar, Qazaqstan Respýblıkasynyń tuńǵysh Prezıdenti N.Nazarbaevtyń tapsyrmasyn oryndaý aıasynda 2024 jyly elimizdiń jalpy ishki ónimindegi týrızm úlesin 8%-ǵa jetkizý jaıy aıtyldy.
Kezdesý nátıjesinde óńirge uzyndyǵy - 12 metr, al syıymdylyǵy - 82 jolaýshy bolatyn eki deńgeıli týrıstik elektrli avtobýs jetkiziletin boldy.
Aıta keterlik jaı, bul avtobýstar «BYD» batareıalarynyń kómegimen jumys isteıdi jáne qýaty 200 km-ge jetedi. Bul Túrkistannyń ekologııalyq jaǵdaıy turǵysynan alǵanda jaǵymdy qalaǵa aınalýyna óz úlesin qosady dep kútilýde. «BYD» ókilderi avtobýstardy bıylǵy jyldyń sońyna deıin tolyq tasymaldaıtynyn baıandady.
Sondaı-aq, qos tarap arasynda Túrkistan oblysy aýmaǵynda elektrlik batareıalar, kún panelderi jáne de elektrlik avtokólikter men elektrlik avtobýstar qurastyrý boıynsha óndiris ashý jóninde kelissózder júrgizildi.
«BYD» sarapshylary bul jobaǵa qyzyǵýshylyq tanytyp, naryq áleýetin zertteıtin boldy. Óz kezeginde, oblys basshysy qytaı tarapyna óndiriske qolaıly jaǵdaılar jasalǵan arnaıy ekonomıkalyq aımaq pen ındýstrıaldy aımaqtardyń bar ekendigin aıtyp, ınvestorlarǵa jan-jaqty qoldaý kórsetiletindigin jetkizdi.
Qytaı delegatsııasynyń bul issapary aǵymdaǵy jylǵy 20-23 mamyr aralyǵynda QHR-na Túrkistan oblysy delegatsııasyn bastap barǵan oblys basshysynyń orynbasary Meıirjan Myrzalıev pen «BYD» prezıdenti Vang Chýanfý myrza arasyndaǵy kelisimderdiń is júzine asýynyń jalǵasy.
«BYD» - bul joǵary tehnologııalyq kompanııa jáne jylyna 700 myńǵa jýyq elektrlik kólik shyǵaratyn qýaty bar óz salasynyń álemdik kóshbasshysy. BYD elektronıka salasynda Samsung smartfondarynyń shamamen 60% qurastyrady, al Huawei kompanııasy úshin mobıldi qurylǵylardyń 50% jınaıdy.
