Túrkistan oblysynda týrıster mingen avtobýs qar qursaýynda qaldy
BÁIDІBEK. QazAqparat - Túrkistan oblysy, Báıdibek aýdanynda qar qursaýynda qalǵan týrısterge kómek kórsetildi. 29 adamnan turatyn týrıster toby Aqmeshit shatqalynda «Yutong» avtobýsymen turyp qalǵan bolatyn, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, búgin 112 basqarý pýltine kúndizgi saǵat 15:00 shamasynda týrısterge kómek kerektigi týraly habarlama túsken. Oqıǵa oryna TJD men «SPiASR» mekemesiniń 4 qyzmetkeri arnaıy tehnıkamen, «LEB» 4 qyzmetkeri 1 tehnıkamen shyqqan.
«Týrıster turyp qalǵan jerge greıder kóligi jiberilip, kúndizgi saǵat 16:25-te avtobýs qar úıindisinen shyǵaryldy. Olar óz baǵyttarymen ary qaraı júrip ketti. Oqıǵa ornynda zardap shekkender men jaraqat alǵandar joq», - delingen habarlamada.
Aıta keteıik, buǵan deıin Aleksandr Tsoı esimdi azamat Facebooktegi paraqshasynda Báıdibek aýdanyndaǵy Aqmeshit taý shatqaly mańynda 29 týrıstiń avtobýspen qar qursaýynda qalǵanyn jazǵan bolatyn. Ózi de sol avtobýspen saıahattap júrgenin aıtqan ol jergilikti tótenshe jaǵdaı qyzmetin úsh saǵat boıy kútip turǵanyn jetkizgen.
