Túrkistan oblysynda turǵyndardyń 56,7%-y gazben qamtylǵan
NUR-SULTAN. QazAqparat - Túrkistan oblysynda ótken jyldyń qorytyndysy boıynsha 1,1 mln. halyq, jalpy óńir turǵyndardyń 56,7%-y tabıǵı gazben qamtyldy, dep habarlaıdy oblystyq ákimdiktiń baspasóz qyzmeti.
2020 jyly 25 nysannyń qurylys jumystaryn júrgizý josparlanýda. Bıyl oblys boıynsha 21 nysannyń qurylysy aıaqtalyp, 154 myń turǵyn tabıǵı gazben qamtylady. Bul týraly Óńirlik kommýnıkatsııalar qyzmetinde ótken brıfıngte oblystyq Energetıka jəne turǵyn úı-kommýnaldyq sharýashylyq basqarmasynyń basshysy Igor Alekseev málimdedi.
Onyń aıtýynsha, bıyl oblys boıynsha jalpy 423 eldi meken nemese 1,2 mln halyq /64,4 %/ tabıǵı gazben qamtamasyz etiletin bolady.
«Oblys ortalyǵy Túrkistan qalasynyń turǵyndary bıyl 50 paıyz gazben qamtylsa, 2021 jyly tolyq barlyq úıler men ǵımarattarǵa kógildir otyn kiretin bolady. Oblys ákimdigimen «Túrkistan oblysyn gazben qamtamasyz etýdiń is-shara jospary» bekitilgen. Josparǵa sáıkes, 2026 jylǵa deıin oblys eldi mekenderin 100% gazben qamtamasyz etý josparlanýda», - dedi basqarma basshysy.
2019 jyly elektrmen qamtamasyz etý salasy boıynsha jyldyń qorytyndysymen oblysta 10 myń halyq turatyn 4 eldi mekende qurylys jumystary aıaqtalyp, paıdalanýǵa tapsyryldy.
Al aýyz sýmen qamtamasyz etý maqsatynda sý qubyry múldem joq 40 myń halyq turatyn 43 eldi mekenge jańa aýyz sý qubyrlary salynyp, 12 eldi mekenniń tozyǵy jetken aýyz sý júıeleri jańartyldy. Nátıjesinde, aýyz sýmen qamtý deńgeıi 80%-dy qurap, 671 eldi meken taza aýyz sý paıdalanýda.
