Túrkistan oblysynda turǵyndar toılardy úıinde jasaýǵa kóshken

TÚRKІSTAN. QazAqparat - Túrkistan oblysynda toıhanalar jabylyp jatqan soń, turǵyndar otbasylyq sharalardy úılerinde jasaýǵa kóshken. Maqtaaral aýdanynda polıtseıler úıinde toı jasaǵan eki turǵyndy anyqtady, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, Maqtaaral aýdanyna qarasty Gúlistan aýylyndaǵy turǵyn úılerdiń birinde toı ótip jatqany belgili bolǵan. Karantın talaptaryn óreskel buzǵan turǵyn 50-ge jýyq adamǵa «Qyz uzatý» toıyn jasap, qonaqtar jınap alǵan. Sonymen qatar polıtsııa qyzmetkerleri kelesi bir úıde 50 adam jınalyp, «Betashar» toıyn ótkizip jatqanyn anyqtaǵan.

Ýchaskelik polıtsııa ınspektorlary eki toıdy da tarqatyp, jınalǵan qaýymǵa túsindirý jumystaryn júrgizgen. Karantın talabyn saqtamaı, adamdardyń kóptep jınalýyna jol bergen toı ıelerine qatysty QR ÁQBtK-niń 425-baby «Halyqtyń sanıtarııalyq epıdemıologııalyq salamattylyǵy salasyndaǵy zańnama talaptaryn, sondaı-aq gıgenalyq normatıvterdi buzý» boıynsha ákimshilik hattamalar toltyrylǵan. Barlyq qujattar Maqtaaral aýdandyq sanıtarlyq epıdemıologııalyq baqylaý basqarmasyna joldanǵan.