Túrkistan oblysynda turǵyndar tirkelmegen qarýlaryn tapsyra bastady
TÚRKІSTAN. QazAqparat – Túrkistan oblysynda turǵyndar tirkelmegen qarýlaryn tapsyra bastady. Atalmysh aktsııa elimizdegi kúrdeli epıdemıologııalyq jaǵdaıdy eskere otyryp, onlaın-formatta ótýde, dep habarlaıdy QazAqparat tilshisi.
Aktsııanyń alǵashqy kúniniń ózinde Túrkistan oblysynyń tártip saqshylaryna turǵyndar 31 qarýyn ótkizgen. Onyń ishinde 29-y tegis uńǵyly ańshy myltyǵy bolsa, qalǵandary oıyq uńǵyly jáne sholaq myltyq bar. Máselen, Saıram aýdanynyń turǵyny óziniń atasynan qalǵan 2 birdeı 12 jáne 16 kalıbrli ańshy qarýlaryn óz erkimen tapsyrǵan. Qazirgi ýaqytta bul qarýlar saraptamaǵa jiberilip, bul azamatqa aqshalaı qarajat tóleý týraly sheshim qabyldanǵan.
«Qarý-jaraq zattaryn óz erkimen tapsyrǵany úshin memleket qarýdyń árqaısysy úshin tıisti tólemin jasaıdy. Bıylǵy jyly is-shara onlaın rejımge aýystyrylsa da, turǵyndardyń belsendiligi baıqalady. Oǵan qosa, qolyndaǵy qarý-jaraq zattaryn tapsyrǵysy kelgen turǵyndar bizge kelmeı-aq, «102« nómirine habarlasýyna bolady. Al, syıaqy tóleý qarý-jaraq zattaryn tapsyrǵan azamattardy usynylǵan shottarǵa aýdarý jolymen júzege asyrylatyn bolady. Tirkelmegen atys qarýyn, oq-dáriler men jarylǵysh zattardy óz erkimen tapsyrǵan azamattar qylmystyq jáne ákimshilik jaýapkershilikten bosatylady», - deıdi TO PD Ákimshilik polıtsııa basqarmasynyń bastyǵy polıtsııa polkovnıgi Almashan Tastanbekov.
