Túrkistan oblysynda turǵyn úıden 2 snarıad tabyldy
Túrkistan oblysynyń polıtseıleri «Qarý» jedel-profılaktıkalyq is-sharasy barysynda zańsyz aınalymnan 2 snarıad, 8 atys qarýyn tárkiledi. Onyń ishinde 2 sholaq myltyq, 5 tegis uńǵyly qarý jáne 1 travmatıkalyq tapansha bar.
Máselen, Keles aýdanynda jergilikti turǵynnyń aýlasynan snarıadqa uqsas zat tabyldy. Belgili bolǵandaı, aýyl turǵyny úıine kórshi aýdannan metall alyp kelgen. Ony suryptaý kezinde eki snarıadty baıqap, polıtseılerdi shaqyrqan.
«Atalǵan jaıt Keles aýdandyq polıtsııa bóliminde tirkeldi. Oqıǵa ornyna jedel-tergeý toby men áskerı bólimniń qyzmetkerleri jetti. Polıtsııa tárkilengen qaýipti qurylǵyny joıý úshin saperlarǵa tapsyrdy», - delingen Túrkistan oblysy Polıtsııa departamentiniń baspasóz qyzmeti taratqan habarlamada.
Al Jetisaı aýdanyndaǵy profılaktıkalyq jumystar barysynda polıtsııa qyzmetkerleri jas jigitten tirkelmegen «OSA» markaly travmatıkalyq tapanshany 4 patronymen tárkilegen.
Búginde tártip saqshylary sotqa deıingi tergeý amaldaryn júrgizip, barlyq mán-jaıdy anyqtaýda.
Sonymen qatar, «Qarý» jedel-profılaktıkalyq is-sharasy barysynda tártip saqshylary 700-den astam qarý ıelerin tekserip, 69 ákimshilik quqyq buzýshylyqty anyqtady. Onyń ishinde, QR Ákimshilik quqyq buzýshylyq týraly kodeksiniń 482-baby «Jeke jáne zańdy tulǵalardyń qarýdy zańsyz ıelenýi, berýi, ótkizýi, saqtaýy, alyp júrýi, tasymaldaýy» boıynsha 5 ákimshilik hattama toltyrylǵan.
QR ÁQBtK-niń 484-babymen «Azamattyq, qyzmettik, marapattyq, kollektsııalyq qarýdy, onyń patrondaryn satyp alý, berý, esepke alý, saqtaý, paıdalaný, tasymaldaý, Qazaqstan Respýblıkasynyń aýmaǵyna ákelý, Qazaqstan Respýblıkasynyń aýmaǵynan áketý jáne Qazaqstan Respýblıkasynyń aýmaǵy arqyly tranzıtpen ótkizý tártibin buzý» - 27 jáne QR ÁQBtK-niń 486-baby boıynsha «Azamattyq, qyzmettik, kollektsııalyq qarýdy tirkeý (qaıta tirkeý) ne ony esepke qoıý tártibin buzý» boıynsha 42 tártip buzýshyny jaýapqa tartyldy.
