Túrkistan oblysynda turalap qalǵan Qajymuqan sport kesheniniń qurylysy qaıta jalǵasady

TÚRKІSTAN. QazAqparat – Túrkistan oblysynda qurylysy toqtap qalǵan Qajymuqan memorıaldyq sport kesheni qaıta salynady. Bul týraly Ordabasy aýdanynyń ákimi Nurbek Badyraqov málimdedi, dep habarlaıdy QazAqparat tilshisi.

Memorıaldyq sport kesheniniń qurylys jumystaryna respýblıkalyq bıýdjetten bıyl 338 mln teńge bólinip otyr. Qazir qujattandyrý jumystary júrip jatyr. Ordabasy aýdanynyń ákimi Nurbek Badyraqovtyń aıtýynsha, aldaǵy bir aı ishinde qurylys jumystary qaıta bastalady. Munda kúsh atasy Qajymuqan atyndaǵy murajaı jáne sport alańy men qonaq úı salynady.

«Jalpy, joba quny 1,5 mlrd teńgeniń kóleminde. Kelesi jyly qurylys jumystary tolyǵymen aıaqtalyp, el ıgiligine paıdalanýǵa beriledi», - dedi Nurbek Badyraq.

Aıta keteıik, Qajymuqannyń 150 jyldyǵyna oraı 2020 jyly Ordabasy aýdanynda sport kesheniniń irgetasy qalanǵan bolatyn. Keıinnen qarjynyń tapshylyǵyna baılanysty qurylys jumystary toqtap qaldy.