Túrkistan oblysynda tuńǵysh ret «Densaýlyq elshisi» ataǵy berildi
TÚRKІSTAN. QazAqparat - Túrkistan oblysynda «Salaýatty tamaqtaný máseleleri, ult saýlyǵynyń tetigi» taqyrybyndaǵy Halyqaralyq ǵylymı-tájirıbelik konferentsııa ótti. Oblystyq densaýlyq saqtaý basqarmasy basshylyǵy men salaýatty ómir saltyn qalyptastyrý ortalyǵynyń uıymdastyrýymen ótken sharaǵa Praga qalasyndaǵy Halyqaralyq bilim berý ınstıtýtynyń dırektory, professor Marına Kanýshına jáne Qazaq Taǵamtaný akademııasynyń ǵalymy Maıgúl Qaınarbaeva qatysty, dep habarlaıdy QazAqparat tilshisi.
Halyqaralyq konferentsııada sondaı-aq óńirdiń medıtsına mekemeleriniń basshylary men densaýlyq saqtaý salasynyń ókilderi de boldy. Shara barysynda tuńǵysh ret «Densaýlyq Elshisi» ataǵy berildi. Óńirde salaýatty ómir salty qaǵıdalaryn nasıhattaıtyn elshiler ataǵyna taekvandodan QR halyqaralyq dárejedegi sport sheberi, 2018 jyly Jakartada ótken Jazǵy Azııa oıyndarynyń qola júldegeri, Álem Kýbogynyń qola júldegeri Nurlan Saılaýbaıuly men oblystyq máslıhattyń depýtaty Murat Sherimuly, «Bizben birge!» eriktiler mektebiniń tóraıymy Jasmın Asqarqyzy men Oblystyq klınıkalyq aýrýhananyń hırýrgııalyq kómek jónindegi orynbasary Janbolat Berdibaıuly ıe boldy.
«Salaýatty ómir saltyn dáripteýge atsalysý árkimniń óz qolynda. Biz bul máselege basa nazar aýdarýymyz qajet. Óńirimizde aýrýhana, emhana sany artqanymen, bul aýrýdyń azaıýyna alyp kelmeıdi. Sondyqtan ult saýlyǵynyń tetigi - salaýatty ómir saltyn ustanýdy maqsat tutýǵa mindettimiz»,- dedi Túrkistan oblystyq densaýlyq saqtaý basqarmasynyń basshysy Muqan Egizbaev.
Jańa tıtýl ıeleri aldaǵy ýaqytta halyqtyń salaýatty ómirge bet burýyna baǵyttaıtyn is - sharalarǵa úles qosyp jańa serpilis bermek. Sonymen qatar jıynǵa qatysýshylar «Paıdaly ónimder» kórmesiniń jumysymen tanysty.
