Túrkistan oblysynda tumaýratyp jedel járdem shaqyrǵandar sany azaıdy
TÚRKІSTAN. QazAqparat – Túrkistan oblysynda tumaý men ókpe qabyný belgilerimen jedel járdem shaqyrýshylar sany azaıdy. Óńirde maýsym aıynda medıtsınalyq jedel járdem ortalyǵyna orta eseppen 3000-ǵa jýyq qońyraý túsken bolsa, qazirgi tańda shaqyrtýlar sany 1800-ge deıin tómendegen, dep habarlaıdy QazAqparat tilshisi.
Sala mamandarynyń sózinshe, shaqyrtýdyń basym bóligi egde jáne orta jastaǵy naýqastardyń dene qyzýy kóterilýi jáne ókpe qabynýy boıynsha túsedi. Máselen, oblys boıynsha JRVI-men - 150-ge jýyq, pnevmonııamen - 120 jáne koronavırýs ınfektsııasy belgilerimen 15-ke ǵa jýyq shaqyrtý bolǵan.
Oblystyq medıtsınalyq jedel járdem stantsııasynyń Call-ortalyǵyna qońyraý shalý kezinde dene qyzýy kóterilgen jáne ókpe qabyný aýrýymen aýyrǵan nemese Covid-19 boıynsha suraqtarǵa bir dárigerlik, 2 orta býyndy keńes berý qyzmeti de uıymdastyrylǵan. Mamandar naýqastarǵa medıtsınalyq keńes berý turǵysynda tolyqqandy jumys jasaýda.
Naýqastar jaǵdaıyna qaraı aýrýhanalarǵa shuǵyl tasymaldanyp, em qabyldaýda. Búginde atalǵan stantsııada táýligine 124 jedel járdem brıgadasy, onyń ishinde Túrkistan qalasy boıynsha 16 jedel járdem brıgadasy qyzmet kórsetýde.
«Shaqyrtý brıgadalaryna 372 dáriger jáne feldsher jumyldyrylǵan. Onyn ishinde Túrkistan qalasy boıynsha 32 dáriger jáne feldsher, 16 júrgizýshi qyzmet kórsetedi. Qosymsha oblysqa qarasty aýdan-qala beketterinde de táýlik boıy dıspetcherler jumys isteıdi. Jedel járdem kólikteri qosymsha 75 ókpeni jasandy jeldetý apparatymen qamtylǵan. Bul indetpen kúreste bar kúshimizdi jumsap, ár naýqastyń ómirine arasha bolýǵa daıynbyz»,-deıdi Túrkistan oblysy medıtsınalyq jedel járdem stansasynyń bas dárigeri Dáýlet Musaev.
Jedel járdem qyzmeti basshysynyń aıtýynsha, aımaqta barlyq medıtsına qyzmetkerleri qorǵanysh kıimderimen jáne mekemege qarasty bólimsheler men beketter dári-dármekpen tolyq qamtamasyz etilgen.
