Túrkistan oblysynda tumaýǵa qarsy ekpe salyna bastady
Baqtyoraz Elemesovtyń aıtýynsha, óńirde turǵyndarǵa Reseılik «Grıppol+» vaktsınasynyń 240 637 dozasy alynǵan. Bul vaktsınalar halyqtyń jalpy 12,14% -na salynatyn bolady. Josparly profılaktıkalyq egý halyqtyń jekelengen sanattaryna, atap aıtqanda medıtsına qyzmetkerleri men jıi aýyratyn balalarǵa, júkti áıelder men jabyq mekemelerdegi azamattarǵa tegin júrgizilmek.
«Ádette tumaýdyń epıdemııalyq maýsymy 1 qazannan bastalyp, kelesi jyldyń sáýir aıynyń sońyna deıin sozylady. Alǵashqy qazan-qarasha aılarynda rınovırýs, adenovırýs, paragrıpp sııaqty jedel respıratorly vırýsty ınfektsııalar tirkeledi. Sondyqtan ekpe jumystary aldyn ala qyrkúıek aıynynyń 15-nen bastalýda. Oblys boıynsha aǵymdaǵy jyldyń 8 aıynda 4820 jaǵdaı jedel respıratorly vırýsty ınfektsııalar tirkelip, byltyrǵy 2019 jylmen salystyrǵanda aýrýshańdyq 11,3%-ǵa tómendegen. Aýyrǵandardyń ishinde 50,7% - 14 jasqa deıingi balalar»,- dedi departament basshysynyń orynbasary.
Baqtyoraz Elemesov sondaı-aq, óńirdegi epıemıologııalyq jaǵdaı barysynda baıandap ótti.
«Mamyr-shilde aılarynda respýblıka boıynsha, onyń ishinde bizdiń oblysta da koronavırýs ınfektsııasynan epıdemıologııalyq ahýaldyń asqynýlary oryn aldy. Boljamdar boıynsha kúz-qys aılarynda koronavırýstyń ekinshi tolqyny týyndap, JRVI men tumaýdyń mezgildik kezeńimen sáıkes kelýi múmkin. Qabattasýy epıdemıologııalyq jaǵdaıdy asqyndyrýy yqtımal. Sondyqtan respýblıka boıynsha tumaýdyń profılaktıkalyq jáne monıtorıngteý is-sharalary aldyn ala pysyqtalyp, qyrkúıekten bastap júrgiziletin bolyp sheshildi», - dedi Baqtyoraz Mızamuly.
Sondaı-aq, brıfıngte qatysqan oblystyq qoǵamdyq densaýlyq basqarmasy basshysynyń orynbasary Nurhan Narymbetova ekpeniń mańyzdylyǵyna toqtaldy.
«Tumaýdyń saldarynan vırýsty jáne bakterıaldy pnevmonııaǵa, otıt, gaımorıt, menıngıt, entsefalıt, sonymen qatar septıkalyq asqynýlarǵa ákelip soqtyrýy múmkin. Óte aýyr jaǵdaılarda jıi ólimmen aıaqtalady. Tumaýdyń aldyn alýdyń eń senimdi joly - epıdemııalyq kezeń bastalmaı turyp tumaýǵa qarsy egý. Sonymen qatar oblysymyzda jumys berýshiler esebinen mekeme, kásiporyn jumysshylaryn egý sharalary qarastyrylýda. Odan bólek azamattardyń óz qarajattaryna tumaýǵa qarsy profılaktıkalyq egýdi Túrkistan qalalyq emhanasy qolǵa alyp otyr», - dedi ol.
