Túrkistan oblysynda traktorshy qyz kúnine 10 gektar jer jyrtady
JETІSAI. QazAqparat - Jetisaı aýdany Qyzylqum eldi mekeniniń turǵyny Araı Asylbekqyzy jastaıynan traktor júrgizedi, dep habarlaıdy QazAqparat.
Ol 11 jasynan bastap aýyr tehnıkany tizgindep úırengen.
Búginde traktordyń kómegimen aýyldastarynyń egistik jerlerin jyrtyp, tabys ta taýyp júr.
«Kishkentaı kúnimnen jeńil kólikke qaraǵanda, osy tehnıkaǵa degen qyzyǵýshylyǵym arta tústi. Osyndaı ereksheligimdi baıqaǵan ákem men aǵalarym betimnen qaqpaı, kerisinshe traktor júrgizýdiń qyr-syryn úıretti. Sol úshin olarǵa sheksiz alǵysymdy aıtamyn. Mine, sonyń arqasynda kúnine 10 gektarǵa deıin egistik jerin jyrtyp, dıqandarǵa kómegim tıip keledi. Kúndelikti isim osy bolǵan soń, traktordyń az-kem tehnıkalyq aqaýlaryn jóndeýdi de úırenip aldym», – deıdi Araı Asylbekqyzy.
Qazirgi tańda Túrkistan qalasyndaǵy joǵary oqý oryndarynyń birinde oqıtyn 1-kýrs stýdentin aýyl arasynda «traktorshy qyz» dep te ataıdy eken.
Onyń bilim alyp júrgen negizgi mamandyǵy - tis dárigeri.
