Túrkistan oblysynda toı jasaǵan turǵyn zań aldynda jaýap beredi
TÚRKІSTAN OBLYSY. QazAqparat - Túrkistan oblysynda tótenshe jaǵdaı kezinde toı jasaǵan turǵynǵa ákimshilik hattama toltyryldy. Óz úıiniń aýlasynda adamdardyń basyn qosyp, toı jasaǵan azamat endi zań aldynda jaýap beretin bolady, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, toı jasaǵan turǵyn QR Prezıdenti Qasym-Jomart Toqaevtyń elimizde tótenshe jaǵdaı engizý týraly qaýlysyn eskermegen. Onyń toı jasaǵany týraly beınejazba áleýmettik jeliler men messendjerlerde taraǵan. Atalǵan jaıt boıynsha Túrkistan qalalyq polıtsııa basqarmasynyń qyzmetkerleri shuǵyl izdestirý sharalaryn atqaryp, toıdyń Túrkistan qalasyndaǵy móltek aýdandardyń birinde ótkenin anyqtaǵan.
«Qalalyq polıtsııa qyzmetkerleri tótenshe jaǵdaı rejımin buzyp jıyn ótkizgeni úshin toı ıesi, jergilikti turǵynǵa QR ÁQBtK-niń 476-baby «Tótenshe jaǵdaı rejımin buzý» boıynsha hattama toltyrdy. Atalǵan jaıtqa baılanysty jınaqtalǵan is-qujat Túrkistan qalasynyń mamandandyrylǵan ákimshilik sotyna joldandy», - delingen habarlamada.
Oblys polıtseıleri turǵyndarǵa zańǵa baǵyný kerektigin eskertedi.
