Túrkistan oblysynda toı-tomalaq ótkizý toqtamaı tur
TÚRKІSTAN. QazAqparat – Túrkistan oblysynda karantındik shekteýlerge qaramastan otbasylyq saltanatty sharalar uıymdastyrý toqtamaı tur. Óńirde qurylǵan mobıldik toptarmen shilde aıynan beri 575 toı jıyn anyqtalyp, tıisti talaptarǵa baǵynbaǵandarǵa 250 mln teńge kóleminde aıyppul salynǵan, dep habarlaıdy QazAqparat tilshisi.
Oblystyń bas sanıtar dárigeri Nurbek Nyshanovtyń aıtýynsha, mobıldi toptar 40 316 nysandy aralaý kezinde 4 901 aıyppul salǵan.
«Búgingi kúnge deıin 135 betashar men 65 kelin túsirý, 79 qyz uzatý men 16 as berý, 183 qudalyq pen 39 besik toı, 8 tusaý keser jáne súndet toı, 50 ujymdyq jıyn toqtatyldy. Monıtorıng toptary jumysynyń nátıjesinde 4 730 jeke tulǵaǵa 30 AEK kóleminde (197 mln teńge), 97 jeke kásipkerge (30 mln teńge), 12 zańdy tulǵaǵa (3 mln t) , 62 laýazymdy tulǵaǵa (19 mln teńge) hattama toltyrylyp, 230 AEK kóleminde aıyppul salyndy», - dedi Nurbek Nyshanov.
