Túrkistan oblysynda toı ótkizýdi toqtatpaı otyrǵan 50 toıhananyń isi sotqa joldandy
Atalǵan departamenttiń málimetinshe, búginde óńirdegi meıramhanalar men toıhanalardyń sany 200-den asady. Epıdemıologııalyq jaǵdaıǵa baılanysty elimizde 1 jyldan astam ýaqyttan beri otbasylyq merekelik is- sharalardyń barlyǵyna tolyqtaı tyıym salynǵandyǵy belgili. Degenmen óńirde toılardyń ótýi áli kúnge deıin toqtamaı otyr.
Jyl basynan beri mobıldi top pen polıtsııa qyzmetkerleri 726 otbasylyq merekelerdi anyqtaǵan. Otbasylyq sharalardyń 435-i meıramhanalarda, 291-i jeke úılerde uıymdastyrylǵan. Ordabasy aýdanynda «Shańyraq» toıhanasy 9 ret, Arys qalasynda «Asylaı» toıhanasynda 8 ret, Saryaǵashta «Altyn Ǵasyr» toıhanasy 6 ret, Otyrarda «Juldyz», «Nursaıa», «Altyn Shańyraq», Jetisaıda «Altyn Saraı», «Tabıǵat», Tóle bıde «Appaq ana», «Shańyraq», Kentaý qalasynda «Aqerke», Túlkibasta «Kerýen», «Kókjaılaý», Shardara aýdanynda «Grand Azııa» toıhanalary 3 retten toı ótkizýge jol berse, Qazyǵurt aýdanynda «Talǵat», «Talǵaı ata», «Medeý ata», «Hanshaıym», «Qazyǵurt ónimderi» meıramhanalary karantın rejımine qaramastan 2 retten otbasylyq sharalar ótkizgen.
«50 meıramhananyń isi sotqa ótkizilip, 34-ne qyzmetterin ýaqytsha toqtatý týraly sot sheshimderi shyqty. Ókinishke oraı, keıbir toıhana qojaıyndary sot sheshiminiń merzimi aıaqtalǵan soń, qaıta toı ótkizýdi jalǵastyrýǵa kirisken. Máselen Túrkistan qalasynda «Ulytaý», Maqtaral aýdanynda «Ferýz» toıhanalaryna 2 retten sot sheshimi shyqqan. Karantın talaptaryn saqtamaı, covid-19 ınfektsııasynyń taralý qaýipin týdyrýǵa jol bergen kásipkerler men jeke tulǵalarǵa ákimshilik quqyq buzýshylyq boıynsha aıyppuldar salyndy» delingen habarlamada.
