Túrkistan oblysynda tótenshe jaǵdaıdyń aldyn alý kartasy jasaldy
El aldynda esep bergen aımaq basshysy jahan jurtyn qursaýyna túsirgen pandemııa kezinde oryn alǵan Maqtaaral oqıǵasyn eske aldy.
«Basyna qıyn is túsken birde-bir adam qamqorlyqsyz qalmady. Bul halqymyzdyń birtutas el ekendigin dáleldedi. «Birligi bekem el, bárin jeńedi» demekshi, apattyń saldaryn joıýǵa búkil respýblıka atsalysty. Bul jaǵdaı Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń jáne Qasym-Jomart Kemelulynyń qatań baqylaýynda boldy. Aýqymdy jumystardyń nátıjesinde aýdandaǵy eldi mekender odan ári kórkeıip, jańa qonys keıpine aınaldy. Maqtaaral aýdanyndaǵy qazirgi jaǵdaı turaqty»,-dedi Ómirzaq Shókeev.
Sońǵy jyldary oryn alǵan apatty jaǵdaılardy negizge ala otyryp, Túrkistan oblysynda tótenshe jaǵdaıdyń aldyn alý boıynsha Antıkrızıstik karta jasalǵan.
«Biz Arys, Maqtaaral aýdanyndaǵy tehnogendik, Tólebı aýdanyndaǵy tabıǵı sý tasqyny kezindegi atqarylǵan jumystardan mol tájirıbe jınadyq. «Apat aıtyp kelmeıdi», degenmen, tótenshe jaǵdaıdyń aldyn alý úshin Shtab qurylady. Onda kiretin barlyq salalyq qyzmetter «Altyn saǵat» erejesine sáıkes jumys júrgizýi qajet. Daǵdarysqa qarsy karta sheńberinde tótenshe jaǵdaımen kúres algorıtmi bekitilgen. Barlyq aýdan, qala ákimderi algorıtmmen jiti tanysyp, nusqaýlyq arqyly jumys isteýi qajet», dedi óńir basshysy.
Oblys ákimdigi janynan qurylǵan Sıtýatsııalyq ortalyq pen oblystyq TJD birlese otyryp jasaǵan kartaǵa sáıkes, oblys aýmaǵynda 200-den asa oryn alýy yqtımal tótenshe jaǵdaı sıpattalǵan.
