Túrkistan oblysynda tótenshe jaǵdaı kezindegi kásipkerlerdiń qyzmeti talqylandy
TÚRKІSTAN. QazAqparat - Túrkistan oblysy ákiminiń orynbasary Meıirjan Myrzalıevtyń tóraǵalyǵymen «Atameken» QR Ulttyq kásipkerler palatasy óńirlik jobalyq keńseniń kezekti otyrysy ótti, dep habarlaıdy QazAqparat Óńirlik kommýnıkatsııalar qyzmetine silteme jasap.
Onlaın rejımde ótken jıynǵa oblystyq Kásipkerler jáne saýda basqarmasynyń basshysy N.Baıǵut, «Atameken» QR Ulttyq kásipkerler palatasynyń basshylyq quramy, ekinshi deńgeıli bankter men «Aýylsharýashylyq nesıe korporatsııasy» AQ-nyń ókilderi jáne «Qarapaıym zattar ekonomıkasy» jobasynyń aımaqtyq mobıldi top músheleri qatysty.
Jıyn barysynda kásipkerlerge tótenshe jaǵdaı kezinde týyndaıtyn qıyndyqtar jaıy talqylandy. Atap aıtqanda, nesıelerdi óteýdi keıinge shegerý, engizilgen tótenshe jaǵdaıǵa qaramastan «Qarapaıym zattar ekonomıkasy» jobasy aıasynda qujattardy jınaý jáne ekinshi deńgeıli bankterge ótkizý, Jobalyq keńse hatshylyǵynyń qorytyndylary, 10 naýryz - 2 sáýir aralyǵyndaǵy bıznes jobalardy qoldaý jumystarynyń nátıjeleri, áleýmettik mańyzy bar azyq-túlik taýarlarynyń baǵasy turaqtandyrý jaıy jáne aýdan-qalalardaǵy mobıldi toptardyń kásipkerlerge onlaın rejımde qoldaý kórsetý algorıtmderi keńinen sóz boldy.
Onlaın-basqosýda ekinshi deńgeıli banktermen jáne «Aýylsharýashylyq nesıe korporatsııasy» AQ-men «Qarapaıym zattar ekonomıkasy» jobalaryn qoldaý úshin Call-ortalyq qurý týraly kelissóz júrgizildi. Nátıjesinde elektrondy poshta arqyly daıyn qujattardy qabyldaıtyn jáne onlaın rejımde jiberilgen túsiniktemelerdi óńdeıtin jaýapty qyzmetkerler bekitiletin boldy. Mobıldi toptarǵa kásipkerlerdiń qujattaryna qatysty týyndaǵan máselelerin tez arada sheshý jumystary júkteledi.
Aıta keteıik, búginde respýblıkada «Qarapaıym zattar ekonomıkasy» arqyly qarjylandyrylǵan jobalar sany boıynsha Túrkistan oblysy kóshbastap tur. Al, qarajattyń ıgerilýi boıynsha IV orynda tur. Jalpy Túrkistan oblysynda «Halyq bankine» qarasty ekinshi deńgeıli banktiń jalǵyz fılıaly bar. Sondaı-aq, aımaqtyń 5 aýdanynda ashylǵan «Aýylsharýashylyq nesıe korporatsııasy» AQ-nyń keńsesi qujat qabyldaýǵa daıyn.
