Túrkistan oblysynda tótenshe jaǵdaı kezinde toı jasaýshylar azaımaı tur
TÚRKІSTAN.QazAqparat – Túrkistan oblysynyń polıtseıleri tótenshe jaǵdaı kezinde kúsheıtilgen rejımde qyzmet atqaryp, tártipke baǵynbaı ári zańǵa qaıshy óreskel áreket jasaýshylarǵa shara qoldanýda. Oblys boıynsha tótenshe jaǵdaı rejımin buzý boıynsha 123 jaıt anyqtalyp, 43 turǵyn qamaýǵa alyndy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, sottyń sheshimimen 63 turǵynǵa ákimshilik aıyppul salynǵan. Taǵy bir azamatqa eskertý berilip, 16 turǵynnyń isi sotta qaralýda.
«Bul quqyqbuzýshylyq jasaǵan azamattardyń biri tótenshe jaǵdaıǵa qaramastan toı, týǵan kún, betashar, tusaýkeser jasaǵan. Ózgeleri oıyn-saýyq oryndaryn ashyp, adamdardy qabyldaǵany úshin jaýapqa tartyldy. Al, taǵy bireýleri shektelgen ýaqytta adamdar toby bolyp shoǵyrlanǵany úshin eskertý alyp jatyr. Sondaı-aq, blokposttarda qyzmette turǵan polıtseıge qarsylyq bildirip, qamaýǵa túsken turǵyn da bar» delingen habarlamada.
Óńirdegi tártip saqshylarynyń qarqyndy jumys atqarýy nátıjesinde qylmystar sany 18,2 %-ǵa azaıǵan. Qoǵamdyq orynda jasalǵan quqyqbuzýshylyqtar 25,7 paıyzǵa, kóshelerde jasalatyn qylmystar 26,2 paıyzǵa tómendegen.
