Túrkistan oblysynda tórt kún buryn joǵalǵan ańshy izdestirilip jatyr

TÚRKІSTAN. QazAqparat – Túrkistan oblysynyń Báıdibek aýdanynda tórt kún buryn joǵalyp ketken ańshy izdestirilip jatyr. Óńirdiń qutqarýshylary jergilikti turǵyndy Júzimdik aýylynan 25 shaqyrym jerdegi Arystandy ózeni men onyń jaǵalaýyndaǵy qamystardyń arasynan izdestirip jatyr, dep habarlaıdy QazAqparat tilshisi.

Oblystyq TJD baspasóz qyzmetiniń málimetinshe, tórt kún buryn Báıdibek aýdanynyń órt sóndirý bóliminiń 101 baılanys telefonyna Arystandy ózeniniń jaǵalaýynda bir azamattyń joǵalyp ketkeni týraly habarlama túsken. Belgili bolǵandaı, izdestirilip jatqan er adam 24-shi aqpan kúni túngi saǵat 22:30-da ańshylyq kezinde joǵalyp ketken.

Seriginiń aıtýynsha, sońǵy ret ol qamys alqabynda adasyp qalǵanyn habarlaǵan. Oqıǵa ornynda izdestirý-qutqarý jumystaryn júrgizýge oblystyq TJD jedel qutqarý jasaǵynyń 11 qutqarýshysy men 2 júzý quraly jáne 1 tehnıka jumyldyryldy. Sondaı-aq, departamenttiń 40 qyzmetkeri men 3 tehnıkasy, Polıtsııa departamentinen 9 qyzmetker, jergilikti atqarýshy organdardan 10 qyzmetker jáne jergilikti turǵyndar 60 adam jetti. Alaıda tórt kúndik izdestirý jumystary ázirge nátıje bermedi. Qazirgi tańda dronnyń kómegimen 40 shaqyrymdaı jerge sholý jasalýda.