Túrkistan oblysynda «Tóle bı» atty kıno túsirilýde
TÚRKІSTAN. QazAqparat - Túrkistan oblysynda Tóle bı týraly 10 serııaly kórkem fılm túsirilýde. Óńir basshysy Janseıit Túımebaevtyń bastamasymen qolǵa alynǵan «Tóle bı» fılminiń alǵashqy túsirilimderi Tóle bı aýdanyndaǵy Qorǵantaý bókterinde ótýde, dep habarlaıdy QazAqparat tilshisi.
Tarıhı týyndynyń jelisi belgili jazýshy, jýrnalıst Shoıbek Orynbaı men Marhabbat Baıǵuttyń «Tóle bı» atty jeti tomdyq eńbegine negizdelgen. Bıýdjeti 150 mln teńge bolatyn fılmdi jergilikti «Saq» kınostýdııasy túsirýde. Jalpy, otandyq kıno ónimine jergilikti 500 - den astam ártis tartylǵan.
Basty róldi M. Áýezov atyndaǵy Ońtústik Qazaqstan memlekettik ýnıversıtetiniń 3 kýrs stýdenti Abzal atty bozbala somdaıdy. Kóp serııalyq fılmniń túsirilim barysyn aımaq basshysy Tóle bı aýdanyna jasaǵan sapary kezinde kórip qaıtty.
«Fılmniń alǵashqy serııalaryn Qorǵantaý jotasynyń eteginde túsirý de tekten-tek emes», - deıdi kıno maıtalmandary.
Óıtkeni úsh júzdiń tóresi bolǵan - Tóle baba naq osy taýdyń eteginde ómiriniń biraz bóligin ótkizgen desedi. Ol týraly ańyz-áńgimelerdiń tamyry da tereńde jatyr. Óz zamanynda Qazaq handyǵynyń tutastyǵy úshin kúresken ol jastaıynan ádildigi men sheshendigi arqyly kópke tanylǵany belgili.
Qazaqtyń birlikte, kelisimde jáne yntymaqtastyqta ómir súrýin oılap, qam jegen qoǵam qaıratkeriniń bolmysy bul fılmde jan-jaqty beınelenbek. Kórkem týyndynyń sońǵy serııalary úsh júzdiń basy qosylǵan qasıetti Ordabasy taýynda túsirilmek. Kópserııaly tarıhı fılm jyl sońyna taman kórermenge jol tartady dep kútilýde.
Aıta keteıik, buǵan deıin óńir basshysy Janseıit Túımebaevtyń bastamasymen «Kúsh atasy - Qajymuqan», «Kıeli Qazyǵurt», «Otyrardy qorǵaý» syndy mýltfılmder men 10 serııaly «Kóne Jetigenniń syry» atty fılmi túsirilip, kórermender nazaryna usynylǵan.
