Túrkistan oblysynda tolassyz jaýǵan jaýyn saldarymen kúres jalǵasyp jatyr
Apta boıy jaýǵan tolassyz jaýyn-shashyn saldarynan Túrkistan oblysynyń Jetisaı jáne Maqtaaral aýdandarynda kósheler men aýlalardy sý basyp, jer astyndaǵy sý deńgeıi kóterilgen bolatyn.
Búginde Tótenshe jaǵdaılar departamenti jáne jergilikti atqarýshy organdardyń tarapynan jańbyr sýlarynyń baǵytyn burý jáne motopompa arqyly sýdy tartyp shyǵarý jumysy júrgizilýde.
Jetisaı aýdany, Qoǵaly aýyly avtojolynyń boıynda «Qoǵaly» qorǵanys bógetin nyǵaıtý jumystary bastalǵan.
Bógettiń uzyndyǵy - 300 metr, bıiktigi - 2-2,5 metr, al eni - 3-6 metr. Sonymen birge aryqtar men kanaldardy tazartý jumystary qolǵa alynǵan.
Jalpy qazirgi tańda Jetisaıda aýdanyndaǵy 241 úıdiń aýlasynan 35000 astam tekshe metr sý tartyp shyǵarylǵan.
Onyń ishinde 17 naýryz kúni saǵat 00-00-den bastap 20 aýla aýmaǵynan 6 700 tekshe metr sý sorylypty.
Jumysqa barlyǵy 170 qyzmetker, 60 birlik motopompa jáne 44 birlik tehnıka tartylǵan.
Sondaı-aq, jergilikti atqarýshy organnan 104 adam, 21 birlik motopompa jáne 33 birlik tehnıkasy jumyldyrylǵan.
Al, Maqtaaral aýdanynda 200-den astam motopompa jumys istep jatyr. Jalpy aýdanda 3 myńǵa jýyq úıdiń aýlalaryn sý basý jaǵdaıy tirkelgen.
Búginge deıin jergilikti ákimdikterdiń jáne oblystyq, aýdandyq tótenshe jaǵdaı qyzmetkerleriniń táýlik boıy atqarǵan jumystarynyń nátıjesinde 15000 kýbtan astam jańbyr sýy tartylǵan.
Qazirgi tańda aýdandaǵy túrli irili-usaqty kollektorlar men aryq-atyzdardy tazalaý úshin 10 ekskovator, 3 malıýtka, 2 kamaz jáne 11 basqa da tehnıkalar jumyldyrylǵan. Sonymen qatar, 139 jeke quram atalǵan jumystarmen aınalysyp otyr.
Sondaı-aq, Ózbekstan Respýblıkasy men Qazaqstan Respýblıkasynyń shekarasynda ornalasqan Ortalyq Myrzashól kollektoryndaǵy aǵyn sýdyń deńgeıi de turaqty baqylaýǵa alynǵan.
«Internet jelilerinde Ózbekstannyń bizdiń aýdanǵa jaqyn aımaqtarynda sý basý oryn alyp jatqandyǵy týraly feık aqparattar taratylýda. Osyǵan baılanysty aýdan turǵyndary arasynda dúrligý bar. Ortalyq Myrzashól kollektoryna kúndiz-túni kezekshilik kestesi qoıylyp, sýdyń kólemi men deńgeıin turaqty baqylap otyrmyz. Túndegi jańbyrdyń az mólsherinen barlyq irili-usaqty kollektorlarda sýdyń túskeni baıqalady. Sondyqtan, aýdan turǵyndaryn sabyrǵa shaqyra otyryp, áleýmettik jeliler arqyly kelgen túrli aqparattardyń ras-ótirigin tekserip baryp qana kóz jetkizýlerińizdi suraımyn», - deıdi aýdan ákimi Baqyt Asanov.
Qazirgi tańda ortalyq kollektor arqyly eki elden jalpy 113 tekshe metr aǵyn sý bosatylýda. Negizinen kollektordyń syıymdylyǵy 120 tekshe metrdi quraıdy.
Keshegi kúnmen salystyrǵanda sýdyń deńgeıiniń tómendegeni baıqalady.
Atalǵan jaǵdaı boıynsha, Túrkistan oblysynyń Tótenshe jaǵdaılar departamentinde jedel shtab quryldy. Resmı málimetke súıensek boıynsha úılerdi sý basý qaýpi joq.
