Túrkistan oblysynda toǵyz aıda 323,9 mlrd teńgeniń ónimi óndirilgen
TÚRKІSTAN. QazAqparat - Túrkistan oblysynda qańtar-qyrkúıek aılary aralyǵynda 300-den astam ónerkásip kásiporyndarymen 323,9 mlrd teńgeniń ónimi óndirilgen. Bul týraly Kásipkerlik jáne ındýstrıaldy ınnovatsııalyq damý basqarmasynyń basshysy Ǵanıbet Áýbákirov Óńirlik kommýnıkatsııalar qyzmetinde ótken brıfıngte málimdedi, dep habarlaıdy QazAqparat tilshisi.
Ǵanıbet Áýbákirovtiń aıtýynsha, kásipkerlikti qoldaý kartasy aıasynda aǵymdaǵy jyly 16,8 mlrd teńgeni quraıtyn 9 jobany iske qosý josparlanǵan. Onyń ishinde 4 joba jýyq arada júzege asyrylady.
«Óńirde aǵymdaǵy jyly iske qosylǵan jobalardyń qatarynda Ordabasy aýdanyndaǵy PET qaldyqtaryn jáne shpateldi talshyqtar óndiretin «Green technology industries» zaýyty, Túrkistan qalasyndaǵy túıe men bıe sútin óńdeıtin «Golden Camel Group LTD» kásiporny men eshki sútin qaıta óńdeıtin «Ordabasy eshki sút ónimderi» JShS-i, sondaı-aq, Qazyǵurt aýdanyndaǵy alkogolsiz sýsyndar óndiretin «Kórik» sharýa qojalyǵy bar. Budan ózge, aımaqta 2015-2019 jyldarǵa arnalǵan kásipkerlikti qoldaý kartasyna jalpy ınvestıtsııa kólemi 426 mlrd teńgeni quraıtyn 87 joba engizilip, jańadan 11 myń jumys orny ashylatyn bolady», - dedi Ǵanıbet Áýbákirov.
Aıta keteıik, qazirgi tańda oblysta 9 ındýstrıaldy aımaq jumys isteıdi. Aýdan, qalalardaǵy ındýstrıaldy aımaqtardyń jalpy jer aýmaǵy 533 gektardy quraıdy. Búgingi kúni Túrkistan oblysynyń ındýstrıaldy aımaqtarynda jalpy quny 80 mlrd. teńgeni quraıtyn 61 joba iske qosylýda. Nátıjesinde jańadan 3 myń jumys orny ashylmaq.
