Túrkistan oblysynda TMD-da teńdesi joq bý-gaz qondyrǵysynyń irgetasy qalandy
TÚRKІSTAN. QazAqparat - Túrkistan oblysynyń Tólebı aýdanynda 1000 MVt bý-gaz qondyrǵysynyń estelik kapsýlasy salyndy. Mamandardyń aıtýynsha, bul qondyrǵynyń ázirge TMD elderinde balamasy joq, dep habarlaıdy QazAqparat tilshisi.
«Bul joba elimizdiń energetıkalyq qaýipsizdigin jáne ulttyq energetıkalyq júıeniń, ásirese, energııa tapshylyǵy bar ońtústik óńiriniń senimdiligin arttyrady. Ikemdi generatsııalaý rejımi bar aralas tsıkldi zaýyttyń qurylysy Qazaqstan Respýblıkasynyń energetıka júıesine jańartylatyn energııa kózderin biriktirý úshin qolaıly jaǵdaı jasaıdy», — dedi «Samuryq-Qazyna» AQ basshysy Almasadam Sátqalıev.
Oblys ákimi energııa tapshylyǵyn sheshý baǵytyndaǵy bul jobanyń asa mańyzdy ekenin jetkizdi.
«Jyl saıyn elimizde elektr defıtsıti baıqalyp keledi. Túrkistan óńirinde energııa tapshylyǵy — óte ózekti másele. Oblysqa qajetti elektr qýatynyń 80%-y syrtqy kózderden tasymaldanady. Atalǵan máseleni túbegeıli sheshý maqsatynda «Samuryq-Qazyna» AQ-men birlesip, mańyzdy bý-gaz stantsııasyn (PGÝ) salatyn bolamyz. Bul joba boıynsha oblysqa boljammen 722,8 mlrd. teńge jeke ınvestıtsııa tartylady. Endi osy joba iske qosylǵan soń óńirde kásiporyndar kóbeıedi, kásipkerlik damı túsedi. Jańa elektr ortalyǵy óńirde energııa tapshylyǵyn joıyp qana qoımaı, jańa jumys oryndaryn ashýǵa, óndiristi damytýǵa oń serpin beredi», – dedi aımaq ákimi Ómirzaq Shókeev.
Joba júzege asqanda tek Túrkistan óńirinde ǵana emes, jalpy Qazaqstan Respýblıkasynda elektr energııasynyń sapasyn arttyryp, energetıkalyq júıeniń teńgerimdiligi men senimdiligin qamtamasyz etetin bolady. Qazir oblysqa qajetti elektr qýaty 320 MVt bolsa, atalǵan joba arqyly qajettilikten úsh ese artyq elektr óndirilmek. Osy arqyly óńir energııa tapshylyǵynan qutylyp qana qoımaı, ózge aımaqtardy da qamtamasyz etpek.
Oblysta enegrııa tapshylyǵy joıylǵan soń iri kásiporyndar men óndiris te damıdy degen jospar bar. Joba 2024-2026 jyldary júzege asyrylady. Mamandar bul jobany TMD aýmaǵynda balamasy joq jobalardyń biri dep baǵalap otyr. Qurylys kezinde 2000-nan astam adam jumyspen qamtylsa, qondyrǵy iske qosylǵan soń 200-den astam turaqty jumys oryndary ashylady.
Manevrlik generatsııalaý rejımimen qýaty 1000 MVt bolatyn bý-gazdy qondyrǵy qurylysyn «PGÝ Túrkistan» JShS kompanııasy júrgizedi. Qazirgi ýaqytta gaz qubyrynyń magıstraldyq jelilerine qosýǵa qajetti tehnıkalyq sharttary men «KEGOC» AQ elektr jelilerine qosýǵa qýat berý shemasy negizge alynyp, aldyn ala tehnıkalyq-ekonomıkalyq negizdeme ázirlendi.
