Túrkistan oblysynda táýligine 20-dan astam turǵyn koronavırýs juqtyrýda

TÚRKІSTAN. QazAqparat - Túrkistan oblysynda jyl basynan beri 200-den astam adam COVID-19 ınfektsııasyna shaldyqqan. Sońǵy táýlikte 37 jaǵdaı esepke alynsa, onyń ishinde 4 jaǵdaı 14 jasqa deıingi balalar arasynda anyqtalyp otyr, dep habarlaıdy QazAqparat tilshisi.

Óńirdiń baǵalaý matrıtsasy «jasyl» aımaqta bolǵanymen, táýligine 20-30-dan asa koronavırýsqa şaldyǵý faktileri tirkelip otyr.

Bıylǵy jyldyń alǵashqy 10 kúninde COVID-19 ınfektsııasyn 222 turǵyn juqtyrǵan.

Jaǵdaıdyń kúrdelene bastaýyn dárigerler – qoǵamdyq oryndarda sanıtarııalyq-epıdemıologııalyq talaptardyń saqtalmaýy men betperde rejımine salǵyrt qaraý syndy faktorlarmen baılanystyrady.

Sondyqtan, sala mamandary qaýipsizdik talaptaryn qatań saqtaýǵa shaqyrady.

«Búginde oblys turǵyndarynyń 99,9 % koronavırýsqa qarsy ekpeniń І komponentin, 98,4% ekpeniń ІІ komponentin qabyldaǵan. «Pfizer» preparatynyń birinshi ekpesin 80 034 azamat saldyrsa, ekinshi komponentti saldyrǵandar sany - 33 076. Jalpy vaktsınatsııalaý kórsetkishteri boıynsha oblysymyz respýblıkada alǵashqy úshtiktiń qatarynda. Degenmen, bosańsýǵa bolmaıdy. 9500-den astam kásipkerlik nysan «Ashyq» baǵdarlamasymen jumys isteýde»,- dedi Túrkistan oblysynyń bas memlekettik sanıtarııa dárigeri Nurbek Nyshanov.

Jalpy óńirde KVI-ǵa qarsy vaktsınany saldyrtý josparlanǵan is-sharalarǵa sáıkes merziminde júrgizilýde.

Oblystyq qoǵamdyq densaýlyq basqarma basshysynyń orynbasary Altyn Dosanovanyń málimetinshe, revaktsınatsııaǵa 59 687 vaktsına jetkizilip, búgingi tańǵa 40 952 adam ekpe qabyldaǵan.

Aımaqta 9 537 kásipkerlik nysan «Ashyq» baǵdarlamasymen jumys jasaýda.