Túrkistan oblysynda taýda joǵalǵan úsh stýdent qalaı kúneltkenderin aıtyp berdi

TÚRKІSTAN. QazAqparat - Túrkistan oblysynda taýǵa shyǵyp, iz-túzsiz joǵalyp ketken jeti týrıstiń úsheýi Ógem taý shatqalynan tabyldy. Úsheýi de dereý Shymkent áýejaıyna jetkizilip, Saıram Ógem ulttyq parkiniń shtabynda ata-analarymen qaýyshty, dep habarlaıdy QazAqparat tilshisi.

Óńirlik TJD bastyǵynyń orynbasary Erik Sarybaevtyń aıtýynsha, stýdentterdi qutqarý operatsııasy áýeden júrgizilgen. Úsheýi de din aman, medıtsınalyq kómekti qajet etpegen. Al, týrısterdiń adasyp ketýine aýa-raıynyń kúrt sýytýy sebep bolǵan. Qalyń tuman men qardyń qalyń jaýǵany jáne jol kórsetýshiniń bolmaýy túrli qıyndyqtar týǵyzǵan.

«Shyńǵa jetken kezde, eki kúnnen keıin jolda adasyp kettik. Keıin jeti adamnyń ishinde bir kisi aýyryp qaldy. Soǵan baılanysty úsheýi bir orynda qaldy da, tórteýi ary qaraı ketti. Úsheýmiz úsh kún túnedik sol jerde, búgin shyǵyp kele jatqan kezde bizdi taýyp aldy TJQ qyzmetkerleri»,- deıdi adasqan stýdentter.

Tórt kúnnen beri izdeý sharalaryn júrgizgen óńirdiń tótenshe jaǵdaılar qyzmetiniń basshylyǵy týrısterdiń as-aýqaty bitip qalǵanyn aıtady. Degenmen eshbiri jatyp qalmastan, qozǵalystaryn toqtatpaǵan. Taýdan tabylǵandar Aqtóbe oblysy men Oral, Jezqazǵan qalalarynyń týmalary. Qazirgi tańda qalǵan tórt týrısti tikushaqpen izdeý jumystary jalǵasýda.

«Qazir olardyń jaǵdaılary qanaǵattanarlyq, medıtsınalyq kómekke muqtaj emes. Qalǵan týrısterdi izdestirý jumystary jalǵastyrylýda. Tabylǵan azamattar Ógem shatqalynda jyraǵa túsip ketken. Saǵat 13:10 shamasynda tabylyp, saǵat 13:45-te áýede eki tikushaqpen qutqarylǵan. Qalǵan týrısterdi qutqarý jumystaryna qutqarýshylar, polıtsııa qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵan adamdardyń týystary, sondaı-aq «Qazavıaqutqarý» mekemesiniń eki tikushaǵy jumyldyrylǵan», - dedi oblystyq TJD bastyǵynyń orynbasary Erik Sarybaev