Túrkistan oblysynda «Taý samaly - Jan samaly» shańǵy festıvali ótti

Sharaǵaǵa oblys ákimi Janseıit Túımebaev qatysty. Jıyn barysynda halyqaralyq jarystarda top jaryp júrgen sportshylar men el chempıonattarynyń jeńimpazdary marapattaldy, dep habarlaıdy QazAqparat tilshisi. 

Oblys turǵyndary qatysqan festıvalda óńir basshysy buqaralyq qysqy sport pen aımaqta týrızmdi damytýǵa aıryqsha serpin berý qajettigine toqtaldy. «Taý samaly-Jan samaly» atty shańǵy festıvali óńirdegi tarıh shejiresine aınalǵan Túrkistan óńiriniń mártebesin ósirip, mereıin arttyrý maqsatynda uıymdastyrylǵanyn jetkizdi.
 

«Bizdiń maqsatymyz óńirdiń tarıhı-mádenı oryndaryn, aımaǵymyzdyń brendi sanalatyn týrıstik áleýetin Elbasynyń «Rýhanı jańǵyrý» maqalasynyń basymdyqtarymen ushtastyra otyryp damytý. Prezıdentimiz bıyl Túrkistan oblysyn qurý týraly tarıhı Jarlyqqa qol qoıǵan soń, Túrkistan qalasynda aýqymdy qurylys jumystary bastaldy. Bunyń bári Elbasymyzdyń Túrkistanǵa degen súıispenshiligi men qamqorlyǵynyń arqasy. Búgingi «Taý samaly - jan samaly» festıvali óńirdiń týrıstik áleýetin odan saıyn kóteredi dep senemin. Endeshe týǵan jerdiń tabıǵatyna tamsanyp, qysqy sportpen shuǵyldanyp, jaqsylap tynyǵyp qaıtyńyzdar. Qazaqtyń tóbe bıi atanǵan uly qaıratkeri - Tóle bıdiń esimin ıelengen aýdan keleshekte týrızm salasy óte jaqsy damyǵan iri ortalyqqa aınalady dep senemin!», - dedi aımaq basshysy.
 

Festıval uıymdastyrylǵan «Taý samaly» demalys aımaǵynyń «Alataý» taý shańǵy bazasy bir mezette 3 myńdaı adamǵa qyzmet kórsete alady. Al, kóktem jáne jaz aılarynda atpen serýendeýge bolady. Festıval barysynda aımaq basshysy osy jyldyń tamyz aıynda Indonezııada ótken HVІІІ jazǵy Azııa Oıyndarynda jeńimpaz jáne júldeger atanǵan 6 sportshyny marapattady. Qarasha aıynda ótken bokstan erler arasyndaǵy el chempıonatyna qatysyp, komandalyq esepte І-oryndy jeńip alǵan 13 saıypqyranǵa Alǵys hattar jáne qarjylaı syılyqtar tabys etti. Sondaı-aq, «Tańǵajaıyp Túrkistan» baıqaýynyń jeńympazdaryna da aqshalaı syılyqtar tapsyryldy.
 

Aıta keteıik, taýly aýdanda qysqy týrızm qarqyndy damyp keledi. Qazirgi tańda aýdanda 70 týrıstik nysan ashylyp, 6 qonaq úı men 2 emdik-saýyqtyrý orny qyzmet kórsetedi. Balalar lageri men 47 demalys aımaǵy saıahatshylardyń súıikti ornyna aınalǵan. Jyl basynan beri jańadan 3 týrıstik nysan iske qosyldy. Búginde aýdandaǵy Qasqasý aýylynda «Qasqasý taý-shańǵy» kýrorttyq bazasynyń ınfraqurylymynyń qurylysy júrgizilýde. Álemdik deńgeıdegi demalys ornynda jergilikti halyqpen qatar sheteldik týrıster de demala alady. Budan ózge aýdanda 30-dan asa tarıhı-arheologııalyq oryndar bar. Árqaısysy tarıhtan, qıly zamandardan syr shertedi. Saq zamanynyń qorǵandary, orta ǵasyrlyq qalashyqtardyń oryndary jáne halyq arasynda aty ańyzǵa aınalǵan tarıhı mańyzy bar «Jylaq ata», «Ǵaıyp Eren Qyryq Shilten», «Nur ata», «Aq meshit» sekildi kópshilik minajat etetin áýlıeli oryndar jurtshylyqty qyzyqtyryp otyr. Osyndaı júıeli jumystardyń arqasynda aǵymdaǵy jyly aýdanǵa 28 myńnan asa saıahatshy kelgen.